Nisaad si Gobernador Pamela Baricuatro sa Sugbo nga iyang ipatuman ang inclusive leadership ug seguraduhon nga ang persons with disabilities (PWDs) hatagan og tingog sa pangagamhanan, atol sa selebrasyon sa PWD Month nga gihimo sa Capitol Social Hall kaniadtong Biyernes, Hulyo 25, 2025.
“Inclusive ta. Tanang sektor sa probinsya, atong iapil sa administrasyon,” matod ni Baricuatro ngadto sa kapin 100 PWDs gikan sa 45 local government units sa probinsya.
“You have a place here. Your concerns will be heard, and your rights will be prioritized,” dugang ni Baricuatro.
Ang usa ka adlaw nga kalihukan nagtutok sa mga polisiya ug programa nga gitumong sa pagpalambo sa accessibility, trabaho, ug social services alang sa mga PWD, subay sa pagduso sa gobernador alang sa inclusive development.
Apan, usa ka praktikal nga hagit ang nitumaw atol sa panagtapok tungod kay ang elevator sa Capitol building nagpabilin nga guba, nga nagpugos sa mga PWD nga nanambong sa paggamit sa hagdanan aron makaabot sa venue sa ikaduhang andana.
Ang elevator dugay na nga wala naglihok tungod sa kapakyasan sa niaging administrasyon sa pagbayad sa service provider.
Nangayo og pasaylo si Baricuatro sa kahasol ug nipasalig sa mga nanambong nga kini nga problema daling sulbaron.
“Promise nako nga sa sunod balik ninyo diri, duna na tay functional nga elevator,” asoy ni Baricuatro sa wala pa mopirma og tseke aron husayon ang wala mabayri nga utang ug aron mapaayo ang pasilidad.
Naa sab sa kalihukan ang batid nga mga mamumulong.
Si Dr. Sherryl Muli-Abellanosa, direktor sa University of San Carlos–Kauban Psychological Center, naghisgot bahin sa pagbuntog sa self-stigma ug pagpalambo sa kaugalingong bili sa iyang diskurso nga giulohan og "Living with Dignity."
Si Dr. Jera C. Armendarez, pangulo sa Area Vocational Rehabilitation Center sa Department of Social Welfare and Development (DSWD) 7, nituki sa mga balaod kalabot sa PWD, mental health sa trabahoan, ug mga programa sa gobiyerno.
“PWDs are not liabilities — they are contributors to nation-building when given the right tools and environment,” pagklaro ni Armendarez.
Gi-organisar ang kalihokan isip kabahin sa mga paningkamot sa Kapitolyo aron palig-unon ang mga sistema sa pagsuporta ug i-promote ang bug-os nga pag-apil sa mga PWD sa katilingban. / CDF