DILI magpanuko si Cebu Governor Pamela Baricuatro sa pagsuspenso sa mga opisyal o personnel sa ospital nga mapamatud-an nga sad-an sa nahitabo sa inahan ug anak nga namatay.
Mao kini ang gipahibawo ni Baricuatro sa Biyernes, Hulyo 25, 2025 human sa nahitabong insidente sa ospital.
“I am inclined to suspend those who are involved with the case mao na akong stand karon,” matod ni Baricuatro sa Hulyo 25.
Subay sa pakisusi, gibutyag ni Dr. Eric Geyrozaga nga pag-abot sa pasyente sa Isidro C. Kintanar Memorial Hospital (ICKMH) naobserbahan na nga dunay komplikasyon ang pasyente hinungdan nga gi-refer dayon sa Carcar Provincial Hospital (CPH).
Matod ni Geyrozaga, niagi na sa tulo ka pagpanganak ang pasyente ug giingong niagi kini og abortion.
Ang unang record sa pagpanganak niini buhi ang bata, ang ika-duha nakuhaan siya sa upat ka buwan.
Anaa pa sa early labor stage ang pasyente, pasabot nga anaa pa sa 2-3 centimeter ang contraction.
Sa dugang pagsusi sa midwife dunay nakita nga cervical polyp nga nakababag sa agianan sa bata hinungdan nga gi-refer na nila kini sa sunod nga hospital.
“...pag tan-aw didto naa siyay cervical polyp kaning murag cyst gani nga 2-3 cm nga nakababag didto nga gawsanan sa bata mao nang gi-refer namo sa Carcar around 3:00-4:00pm,” matod ni Geyrozaga.
Ang Argao District Hospital usa ka infirmary, pasabot nga makapaanak kini gikan sa ikaduha o ikatulo basta walay komplikasyon o normal ang delivery.
Samtang ang Level 1 hospital adunay kapasidad sa pagpaanak ug pagpahigayon sa cesarean operation gumikan kay aduna kini specialista.
“Actually ang pasyente murag kausa ra siya naka-prenatal then naa man siyay previous abortion so high risk na gyud siya...Usually kung mo-rupture na ang membrane sa bata then pananglitan hugaw siya unya dugay na kayo then mag start nata og IV ana ug mag antibiotic ta. If prolonged na gyud kaayu unya inactive labor pa mao na irefer na gyud nato sa Level 1,” gidugang niya.
WAY GASOLINA?
Giklaro usab sa doctor nga di tinuod nga problema sa mga hospitals ang gasolina hinungdan nga dugay kini makapadala sa mga pasyente.
Samtang ang hepe sa CPH nga si Dr. Prudencio Manubag nagkanayon nga walay naki-tang lapses ang hospital sa procedures nga gihimo niini.
“So far we have no lapses that we encounter because the patient was properly monitored inside the labor room including the baby,” matod ni Manubag sa mga tigbalita sa Hulyo 25, 2025.
WAY DOKTOR
Gidugang ni Manubag nga adunay upat ka mga ObGyne ang hospital apan giingong sa maong higayon dili available ang doctor.
“the status of the patient is normal that time...but the patient is well monitored...We have the capacity but at that time the doctor is not available...” dugang niya.
Gipasabot usab sa doctor nga ang gi-mention nga cervical polyp sa pasyente gikinahanglan pa nga susihon kon naghatag ba kini og dugang risgo kaniya.
“Actually we cannot say that because the cyst that you mentioned we have to validate how risky is that cyst it is not being mentioned by the OB specialist upon admission, but you have to understand that the doctor in Carcar is just GP so the assessment of the GP and the specialist is very different,” matod ni Manubag.
Hinungdan nga gihimug-atan sa gobernador nga bisan og gipangga niya ang mga doktor ug medical health workers apan kon adunay igong rason nga suspensuhon kini giingong dili siya maglangay sa pagpatuman niini batok kanila. / ANV