GIPASALIGAN og balik ni Cebu Governor Pamela Baricuatro ang mga negosyo nga adunay kasamtangang kontrata sa gobiyerno nga “wala’y angay kabalak-an” bahin sa posibleng pagputol sa ilang kasabutan ubos sa iyang bag-ong administrasyon.
Gipadayag kini ni Baricuatro atol sa usa ka press conference niadtong Miyerkules, Hulyo 16, 2025, human sa usa ka tigom diin gihatagan og higayon ang Mister Loo, nga maoy operator sa mga comfort room sa Cebu South Bus Terminal (CSBT), aron mosugyot og kausaban sa ilang kasamtangang kasabutan.
Matod sa gobernador nga kon ang Mister Loo mapakyas sa paghatag og “paborableng tubag” sa hangyo sa Probinsya alang sa pag-usab sa kontrata, putlon ang kontrata sa operator.
Apan, gitataw ni Baricuatro nga ang baruganan sa kompanya dili hulga sa ubang negosyo.
“Nothing to be worried about kon tinarong nga negosyo, there’s no reason nga i-terminate nato kon sakto ang kontrata ug naprotektahan ang rights sa atoang taga Probinsya sa Sugbo,” matod ni Baricuatro.
“Wala gyu’y rason nganong atong i-terminate, we follow the rule of law.”
Ang pagduso sa Probinsyal nga Gobiyerno alang sa pagbag-o sa kontrata sa Mister Loo nag-ugat sa kabalaka bahin sa revenue sharing ug serbisyo publiko.
Usa ka naunang taho sa SunStar nagpakita nga ang Probinsya sa pagkakaron nakadawat lang og singko porsiyento sa kinatibuk-ang kita sa Mister Loo ubos sa kasamtangang kasabutan.
Matod ni Provincial Administrator Joseph “Ace” Durano nga ang Mister Loo giingong mokolekta og gibanabana nga P33,000 kada adlaw gikan sa CSBT lang.
Kini nagpasabot sa gibanabana nga P7 million sa kinatibuk-ang koleksyon sukad nagsugod ang kontrata niadtong Disyembre 21, 2023.
Base sa maong mga banabana, ang bahin sa Probinsya nikabat lang sa gamay nga P1,650 matag bulan.
Usa ka report gikan sa Enero hangtod Hunyo nga gibahin sa Kapitolyo nagpakita nga ang Mister Loo nakakolekta og P198,115.16 sa CSBT ug P114,616 sa Cebu North Bus Terminal (CNBT) sulod niining panahuna.
Gihatagan ang Mister Loo og duha ngadto sa tulo ka mga adlaw aron mosugyot og giusab nga mga termino sa kontrata.
Kon ang isugyot sa Mister Loo nga mga kausaban dili makahatag og katagbawan, gikumpirmar ni Baricuatro nga ikonsiderar sa Probinsya ang pagputol sa lima ka mga tuig nga kasabutan, nga gitakda nga mahuman sa Disyembre 2028 ug adunay opsyon sa pag-renew.
Ang kontrata nagtumbok sa P10 nga bayad alang sa standard CR access ug P20 alang sa premium access, nga naglakip sa mga amenities sama sa air conditioning ug gi-upgrade nga mga pasilidad, nga walay gitugot nga pagtaas sa bayad sulod sa termino sa kontrata.
Mahinungdanon nga masayran nga usa ka executive order nga giisyu ni Gobernador Baricuatro niadtong Hulyo 1 ang nagpahunong sa bayad sa CR sa mga terminal nga direkta nga gipadagan sa Probinsya.
Apan kining maong executive order dili magamit sa mga pasilidad sa Mister Loo tungod kay pribado kini nga gipadagan ubos sa kasamtangang kontrata. / JPS