Giharos na sab sa Barili ang ilang duha ka mga tahas sa hinampakay sa ikatulong sunodsunod nga higayon sa men’s ug women’s divisions sa 1st Mayor Inocentes Cabaron Invitational Volleyball tournament ning bag-uhay lang sa Moalboal Covered Court sa lunsgod sa Moalboal, Cebu.
Ang Barili maoy bugtong team nga wala pa nakatilaw og pilde sa duha ka divisions hinungdan nga sila na ang labing inilog nga makalangkat sa labing dakong ganti nga P50,000 sa torneyo, nga tipik sa kasauloghan sa piyesta sa lungsod nga pahinungod ni San Juan Nepomuceno.
Sa men’s category, gipangbuntog sa Barili ang Badian, 28-26, 25-11, samtang nagkinahanglan og tulo ka sets ang Barili una nila nalupig ang Badian, 18-25, 25-20, 25-21.
Sa laing bahin, ang host Moalboal nakasinati managlahing resulta diin naposte sa ilang men’s squad ang ikatulo niining sunodsunod nga kadaugan samtang naangkon sa ilang women’s team ang labing una niining pilde sulod sa tulo ka mga duwa.
Sa pagpangulo ni playing captain Dave Cabaron, ang Moalboal ningbuntog sa Dumanjug, 25-21, 25-23, sa men’s division, samtang ang nasugamak ang women’s team sa Moalboal sa kapildihan, 25-14, 25-17, 21-20. / ESL