Nasumpayan ang gitas-on sa listahan sa dekalidad nga mga boksidor nga ninghatag og prediksyon kabahin sa gikahinamang away nila ni American Terence Crawford ug Mexican superstar Saul Canelo Alvarez.
Ning bag-uhay lang, si Mexican legend Marco Antonio Barrera ang nibuhi sa iyang panahom kabahin sa away, nga gikatakda karong Septiyembre 13, 2025, sa Allegiant Stadium sa Las Vegas, USA.
Sa wala’y pagduhaduha, nagkanayon si Barrera nga modaog ang iyang kababayan ning awaya.
Dihang nakaplano pa lang kining maong away, si Barrera nakasugat na og pangutana sa usa ka interbyu niadtong Mayo, 2024 nga kon sa iyang tan-aw, aduna ba’y purohan si Crawford.
“No, he’s small,” direktang tubag ni Barrera nga napatik sa www.secondsout.com..
Wala nausab ang pagtuo ni Barrera.
Si Crawford mosaka og duha ka weight divisions aron makontra lang si Alvarez, kinsa lima na ka mga tuig nga nagdominar sa super middleweight division. / ESL