Giklaro ni World Boxing Council (WBC) welterweight champion American Mario Barrios nga dili siya mohatag og respeto ni Filipino boxing legend Manny Pacquiao sa ilang binukbokay karong Hulyo 20, 2025 (PH time), sa MGM Grand Garden Arena sa Las Vegas, USA.
Mao kini ang gipabuhagay ni Barrios atol sa iyang media workout sa Las Vegas ning bag-uhay lang.
Nidugang si Barrios nga dautan ang iyang intensyon ngadto sa kanhi 8-division world champion ibabaw sa ring.
“It’s all smiles between us right now, but when that bell rings, we’re going in there with bad intentions. Pacquiao’s trying to take my title and I have to do whatever it takes to make sure he doesn’t,” matod ni Barrios nga napatik sa www.boxingscene.com.
Si Barrios, kinsa nag-edad og 30 ug adunay 29-2-1, 18KOs nga rekord, nipadayag nga grabe ang iyang pagpangandam alang ning awaya ug iyang gipaneguro nga 100% ang iyang kaandam sa pagpakigbatok sa Pambansang Kamao ng Pilipinas.
“During training camp I haven’t really been working with the mentality that I’m facing a legend,” dugang ni Barrios.
“At the end of the day, he’s another man who’s trying to fight for my title. I respect what he’s done in the sport and the person he is, but come fight night, that respect won’t be there.”
Ang trainer ni Barrios nga si Bob Sanchez niangkon nga dili sayon alkontrahon ang estilo ni Pacquiao apan iyang gitino nga kaya kining sagubangon ni Barrios.
Masaligon si Sanchez nga modaog ang iyang batos, hinuon wala siya’y gihatag nga prediksyon kon pinaagi sa desisyon o knockout.
“This camp has been fantastic. Everyone has been doing a great job with their piece. In the end, Mario has put in the work and he will be victorious on July 19. Take it to the bank,” asoy ni Sanchez.
Bisan nag-edad na og 46 si Pacquiao ug dul-an sa upat ka mga tuig kini nga wala niaway, nagtuo si Sanchez nga aduna gihapon kini saktong ikabuga hinungdan nga dili angayang molugak bisan gamay si Barrios. / ESL