Barrita: Ang Kalbaryo sa CBRT project

Barrita Tikdul-Tikdol
Barrita Tikdul-Tikdol

Hapit na ang Semana Santa, ang pagsaulog ug paghandom sa kalibotang Kristohanon sa pagpalansang sa krus ni Kristo didto sa bukid sa Kalbaryo nga gitawag usab nga Golgota. Si Kristo gisakit ug gilatos sa wa pa siya ilansang sa krus.

Sa daghang kalangay nga giagian sa Cebu Bus Rapid Transit System (CBRT) sa dakbayan sa Sugbo, makaingon kita nga ang kapin sa P28 bilyunes nga proyekto nag-agi sa daghang Kalbaryo. Kuyaw pa gyud nga malansang kining maong proyekto ug di gyud mahuman.

Pero ang mga eksperto sa transportasyon namahayag na nga ang CBRT di makaluwas sa problema sa kahuot sa trapiko sa Siyudad sa Sugbo. Ang unang angay sulbaron sa nagpasiugda sa CBRT mao ang suliran sa kalangay nga giagian niini.

○ ○ ○

Gitrabaho karon ang kapin sa duha ka kilometro nga unang hugna sa CBRT gikan sa Kapitolyo sa Osmeña Blvd. ngadto sa Cebu South Bus Terminal (CSCT) sa N. Bacalso Avenue. Apan ang unang hugna pa lang gani sa upat ka hugna nga proyekto nag-agi na og laing Kalbaryo.

Ang Sangguniang Panlalawigan (SP) nipasar og duha ka resolusyon. Una, ang pagpaghunong sa trabaho sa bus terminal duol sa Kapitolyo nga way permiso sa pag-ugmad duol sa heritage site. Ikaduha, ang pagpahunong sa kinatibuk-ang proyekto.

Apan makapahunong ba gyud kaha ang Kapitolyo sa CBRT nga usa ka proyekto sa gobyerno nasyonal ubos sa Department of Transportation? Bisan ang mga ubos nga hukmanan gidid-an man gani sa balaod sa pagpahunong sa usa ka national government infrastructure project.

○ ○ ○

Ang nakaalegre niini kay nangapil ang daghang dagkong opisyales sa Sugbo. Si Cebu Gov. Gwendolyn Garcia niingon nga ang Kapitolyo maoy tag-iya sa Osmena Blvd. ug tibuok luna sa Kapitolyo.

Samtang si Cebu City Mayor Michael Rama niawhag kang Gov. Garcia nga dili manghilabot sa proyekto sa dakbayan. Ikiha ni Rama ang si bisan kinsa nga mobabag sa CBRT project.

Nisagbat sab si kanhi Mayor Tomas Osmeña kay ang Osmeña Blvd. ug ang parte sa luna sa Kapitolyo gipanag-iya sa ilang pamilya kay wala madayon ang swap deal niadto sa iyang amahan, si kanhi senador Serging Osmena, tali sa Kapitolyo. Bawion niya ang ilang yuta kon babagan sa gobernador ang CBRT, usa sa iyang mga pet projects.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph