Barrita: Bag-ong Kapitolyo sa Balamban madayon ba gyud?

Tikdul-Tikdol
Barrita
Barrita

Daghang local government units (LGUs) sa Sugbo nga namalhin sa mga bag-ong edipisyo o naglaraw nga magbutang og bag-ong mga government center.

Ang siyudad sa Carcar sa habagatan, anaa sa ilang bag-ong City Center. Ang lungsod sa Liloan sa amihanan, nagtukod og bag-ong government building, pangandam tingali sa pag­himo niini nga usa ka siyudad.

Ang dakbayan sa Sugbo nag­laraw nga balhinon ang City Hall gikan sa naghuot nga dapit, ngadto sa mas dako ug hamugaway nga luna sa South Raod Pro­perties. Ang siyudad sa Mandaue nagplano sab nga magtukod og bag-ong City Hall. Nunot sa paglambo, nanagko sab ang mga munisipyo.

Mao kana nga daghan ang nangutana kon madayon ba gyud ang pagbalhin sa Kapitolyo gikan sa siyudad sa Sugbo ngadto sa lungsod sa Balamban.

Kon gasto lang maoy hisgutan, kaya kaayo kini sa ka­gamhanan sa lalawigan sa Sugbo, ang labing adunahan nga probinsiya sa Pilipinas.

○ ○ ○

Sa miaging semana, gihatagan kining inyong kolumnista og eksklusibo nga access sa nagpadayon nga pag-ugmad sa project site sa bag-ong Ka­pitol didto sa lungsod sa Ba­lamban.

Ang Kapitolyo nakapalit na og unom ka titulado nga luna sa yuta nga miabot og 17.5 ka ektarya sa project site.

Sumala sa contractor hapit na mahuman ang project site development sa bag-ong Kapitolyo nga mokabat sa kapin sa duha ka ektarya diha sa barangay Kambuhawe ug Cansomoroy sa Balamban.

Adunay upat ka lane nga highway nga padayong gihimo pai­ngon sa bag-ong Kapitolyo nga magtungtong unya sa ibabaw sa usa ka bungtod kansang tumoy gipatag. Segurado gyud ko nga di mabahaan ang maong dapit.

○ ○ ○

Apan di madali ang pagbalhin sa Kapitolyo gikan sa siyudad sa Sugbo ngadto sa Balamban. Ang project site development gibanabana nga mobalor og labing menos P200 milyunes.

Sanglit gipasiugdahan kini ni Cebu Gov. Gwendolyn Garcia, makapaabot kita nga humnon niya kini samtang siya pa ang gobernador.

Gilantawan nga ang pagbalhin sa Kapitolyo makapakusog sa paglambo sa kasadpang bahin sa lalawigan sa Sugbo nga mao karon ang matawag nga atong industrial center, tungod sa malambuon nga shipbuilding industry sa Balamban nga hapit na sab mahimong usa ka siyudad.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph