Gideklarar sa Korte Suprema nga ang mga barangay adunay gahom nga magpahigayon og mga bingo fundraiser bisan way permit gikan sa lokal o nasyonal nga kagamhanan.
Mao kini desisyon sa Supreme Court En Banc sa Republic of the Philippines and the City of Baguio v. The Association of Barangay Councils (ABC) (G.R. No. 207118, April 22, 2025) nga sinuwat ni Associate Justice Jose Midas P. Marquez.
Gidasonan sa Labaw’ng Hukmanan ang katungod sa Barangay Trancoville, Outlook Drive ug Military Cut-off sa Baguio City sa pagpahigayon og mga Bingo sa Barangay aron makatigom og pundo alang sa mga proyekto bisan way permit gikan sa Philippine Amusement and Gaming Corporation (PAGCOR).
Ang maong mga barangay nagpasar og mga resolusyon nga naghimo sa bingo games nga mga opisyal nga barangay fundraiser events.
Apan sa usa ka bingo event, gisikop sa Baguio City police ang mga opisyales sa barangay sa kalapasan sa Presidential Decree No. 1602, ang Anti-Gambling Law.
Mipetisyon ang ABC sa Regional Trial Court (RTC) nga ideklarar ang bingo games nga balido nga gahom sa barangay.
Gisupak kini sa Republic of the Philippines nga miingon nga dili kini mahimo sa mga barangay kon way permit gikan sa PAGCOR, kay ang PAGCOR maoy dunay eksklusibong gahom sa pagpadagan sa pasugalan.
Nipabor ang RTC ug Court of Appeals (CA) sa mga barangay, subay sa Local Government Code (LGC) of 1991 nga naghatag kanila og gahom sa pagpahigayon og mga bingo fundraisers alang sa mga community projects bisan way national or local permits.
Matod sa Korte Suprema, ang mga barangay mga basic political units ubos sa Konstitusyon nga adunay local autonomy.
Ang Section 391 sa LGC nagtugot sa mga barangay sa pagpahigayon og fundraising activities sama sa bingo games alang sa mga lokal nga proyekto basta mosubay sa national standard sa moralidad, panglawas ug kaluwasan.
Samtang ang PAGCOR Charter nga giamendahan sa Republic Act No. 9487, naghatag sa PAGCOR sa gahom sa pag-regulate sa bingo games sa tibuok nasod, wala maapil ang mga games of chance, cards, and numbers nga ubos sa gahum sa mga local government units.
Busa, ang mga resolusyon sa mga barangay nga nagtugot sa bingo isip fundraiser wala masakop sa regulatory authority sa PAGCOR.
Gihingusgan sa Korte Suprema ang gahum sa mga barangay sa pagtigum og local revenues.
Kini nagkanayon, “Barangays must be empowered. To allow barangays to conduct ‘Bingo sa Barangay’ as a fund-raising activity for barangay projects without the need to secure permits from PAGCOR or any national or local office or agency is to breathe life to the constitutional mandate of the State to ensure the local autonomy of barangays. This is the duty of this Court.” (edbarrita@gmail.com )