Barrita: Binulto nga kompra sa semento

Tikdul-Tikdol
Barrita
Barrita

Nag-hoarding og semento ang usa ka negos­yante tungod sa nadawat nga impormasyon nga mosaka ang presyo niini paglabay sa unom ka buwan.

Tuod man, miumento gyud. Apan pagsusi niya sa mga semento sa bodega, nibagtok ug nigahi na nga mora’g bato. Sama sa panultion nga “Pera na sana, naging bato pa.”

Dunay makapahimuot nga estorya bahin niining pagkompra og semento nga gipaambit kanako sa mga nag-eskuyla og management. Sa 1974, nag-awas-awas ang kuwarta sa Nigeria tungod sa ilang kita sa bag-ong nadiskubrehan nga deposito sa lana.

Nangompra dayon sila’g semento aron pagpalambo sa ilang infrastructure. Miabot og 20 ka milyon ka toneladang semento ang ilang gipalit. Apan dul-an sa duha ka tuig una kini madiskarga. Ngano man? Maglinya pa ang mga barko una makadunggo. Kay lakip sa semento nga gikompra alang man sa paghimo sa ilang bag-ong pantalan.

○ ○ ○

Dunay plano ang kagamhanan sa lalawigan sa Sugbo nga magpalit og binulto nga semento gikan sa mga cement companies alang sa nagpadayon nga pag-ugmad sa mga infrastructure project sa kalungsoran sa lalawigan.

Sa maong paagi, matod ni Cebu Governor Gwendolyn Garcia, maminusan ang bayranan sa mga kontraktor nga mopalit og semento. Busa, makadaginot usab ang Kapitolyo sa kantidad nga itagana unta sa mga kontraktor nga sagad makasinati og managlahi nga presyo sa semento sa pagpatuman sa proyekto.

Kay kon momahal ang semento atol sa pagpatuman sa proyekto, dili usab malikayan nga magpaumento ang kontraktor sa presyo sa ilang pagtrabaho. Di na kini mahitabo kon gikompra sa binulto ang semento.

○ ○ ○

Mokabat sa P3.5 bilyunes ang gigahin nga pundo sa Kapitolyo alang sa mga proyekto sa imprastraktura sa 2024. Samtang dunay P3.3 bilyunes alang sa inter-local government units (LGU) water system ug P500 milyunes alang sa pagtukod og public buildings ug ubang istruktura.

Sumala sa taho ning ning mantalaan base sa uwahing datos sa Cebu Provincial Engineering Office, di mominos sa 1, 687, 306 ka sako sa semento ang magamit sa mga road project sa Kapitolyo karong tuiga.

Sagad sa mga semento sa pagkakaron tag P170 ngadto na sa P230 ang matag sako. Gihatagan ni Garcia og kahigayunan ang mga cement companies nga mohimo og business proposal alang sa labing barato nga presyo sa semento nga ilang mahatag sa Kapitolyo isip buyer.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph