Barrita: BRT, palpak sa ubang nasod, di solusyon sa trapik

Tikdul-Tikdol
Barrita Tikdul-Tikdol
Barrita Tikdul-Tikdol

Gusto’ng ipahunong nila ni Majority Floor Leader Jocelyn Pesquera ug Councilor James Anthony Cuenco ang Cebu Bus Rapid Transit (CBRT) project tungod kay napalgan nga palpak ang BRT sa ubang mga nasod sama sa Curitiba sa Brazil, sa Aminabad ug Delhi sa India, Hanoi sa Vietnam ug Bangkok sa Thailand.

Samtang, ang mga motorista ug mga drayber sa mga depasaheroang sakyanan nga nagping-it sa kahuot sa trapik sa nagpadayon nga construction sa Phase 1 sa CBRT nangagho ug miingon nga ang CBRT, kon maoy gitumbok nga solusyon sa kahuot sa trapik, nakapasamot na hinuon sa kahuot niini.

Apan solusyon ba sa kahuot sa trapik ang CBRT? Dili, matod pa ni Engr. Nigel Paul Villarete, usa ka urban planner. Matod niya gidesinyo ang CBRT aron moumento ang kalidad sa “commuting service,” sa kaluwas sa mga sumasakay nga naglangkob sa 70 porsyento sa mga lomulupyo sa siyudad ug “environmental efficiency.”

* * *

Hagip-ot ang kadalanan sa siyudad. Mabara ang trapik kon dunay mga sakyanan mga magbangga. Samot nga gisirad-an ang pipila ka mga lane sa Osmena Blvd. tungod sa construction sa CBRT. Maayo gani kay gipaablihan ni Cebu City Vice Mayor Raymond Garcia.

Kon dunay trapik sa kadalanan, duna say trapik sa pag-aprobar sa CBRT. Ang prefeasibility study niini giaprubahan sa Asian Development Bank, World Bank ug Overseas Economic Cooperation Fund Japan sa 2008 pa, apan nasugdan kini sa 2023 na sa budget nga P16 bilyunes.

Niadtong Nobiyembre, gipahibawo sa National Economic Development Authority (Neda) ang mga kausaban sa CBRT. Imbis mahuman sa 2025, sa 2027 na. Nunot sa kausaban sa desinyo niini, ang balor sa CBRT nisaka gikan sa P16.3 bilyunes ngadto sa P28.78 bilyunes.

* * *

Ning tungora lisod na ang pagpahunong sa CBRT project. Nagkadako na man gani ang balor niini. Niadtong 2018, ang Department of Transportation mirekomendar nga kanselahon ang CBRT project kay di kini magsilbi tungod sa kahagip-ot sa kadalanan sa siyudad sa Sugbo.

Apan tan-awa ninyo, naa lang gihapon ang CBRT. Ang atong pangutana mao, nganong giduso kini dinhi sa siyudad sa Sugbo kon nasayran na nila nga palpak diay kini sa ubang mga siyudad sa laing mga nasod.

Si Villerete miingon nga ang CBRT alang sa kinabag-an sa katawhan nga way mga sakyanan.

Ang bentaha sa CBRT kay dunay dedicated bus lanes alang niini nga way laing makaagi. Way trapik sa CBRT. Buot ipasabot, kon maghuot ang trapik, sakay mo sa CBRT.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph