Barrita: Department of Water

Tipik sa balaod
Barrita Tipik sa Balaod
Barrita Tipik sa Balaod

Mahinungdanon kaayo ang tubig. Dunay niingon nga mas maayo pang maputlan og kuryente kay sa maputlan og tubig. Kay gigamit ang tubig para mainom, sa pagluto, sa pagkaligo, sa pagpanglaba, sa pagpanghugas, panghimasa, panghilam-os ug ilabi na sa agrikultura.

Dihay asawa nga nikonsulta sa doktor kay kalit lang masuko iyang bana. Matod sa doktor, “Sayon ra na Misis. Kon masuko imong bana, ugom lang og tubig.” Gibuhat kini sa asawa ug tuod man epektibo. Nibalik siya sa doctor ug miingon, “Sakto ka, Dok, tubig ray makapakalma sa akong bana.” Ingon sa doktor, “Nikalma siya kay samtang nag-ugom ka og tubig, sirado imong baba.”

Ang tubig usa sa mga gasa sa kinaiyahan. Apan mahal ang bayad sa tubig kay dako ang gigasto aron moabot kini sa gripo sa kabalayan. Apan kon di kita mag-amping hayan mohubas kini sama sa katubigan sa mga linaw sa mga sapa sa atong kabukiran.

Dihay tulo ka kolehiyala nga nisuroy sa kabukiran ug naagni sa tin-aw kaayong tubig sa linaw. Naligo sila nga hubo kay wa kadala og humdunon. Niabot ang usa ka tiguwang lalaki maong ilang giingnan, “Lakaw una, Noy, kay naghubo ra ba mi.” ingon sa tiguwang, “Dali ra man ko. Igo ra kong maglawog sa mga buaya.”

Mahinungdanon ang tubig. Apan nahibawo ba mo nga kapin sa 40 ka mga ahensiya sa kagamhanan ug gatusan ka mga water district ang nagpadagan sa mga butang mahitungod sa tubig? Mao kana nga nagkalandrakas ug nagyagaw lang ang mga lagda bahin sa water management.

Dinhi sa Siyudad sa Sugbo, wa pa masulbad ang kaguliyang sa liderato sa Metropolitan Cebu Water District (MCWD). Kay dunay balaod nga nagtugot kang Cebu City Mayor Michael Rama sa pagtudlo og mga sakop sa board of directors, apan hanap bahin sa gahom sa pagpalagpot kanila.

Busa, si Senador Imee Marcos misugyot nga panahon na sa pagmugna sa usa ka Department of Water nga maoy bugtong ahensiya nga magdumala ug magpadagan sa tanang mga butang mahitungod sa tubig, ilabi na sa nagpadayon nga hulga sa El Niño.

Si Senador Marcos, sa usa ka interview sa “Beyond the Headlines,” ang news and commentary program sa SunStar Cebu, niingon nga bisan sa kadaghan sa mga ahensiya bahin sa tubig, hinay lang gihapon ang agas sa mga gripo.

Lakip niining maong mga ahensiya mao ang Bureau of Soils and Water Management, River Management, Flood Control Management, Local Water Utilities Administration, National Irrigation Administration, National Wastewater Surveillance System, ingon man ang gatosan ka mga water district sa tibuok nasod, sama sa MCWD.

Si Marcos miingon nga duna siya’y pending bill alang sa pag-aghat sa gobyerno nasyonal nga magmugna og usa ka ahensiya nga maoy bugtong magdumala sa tanang butang bahin sa tubig ug labing menos, mag-awhag sa nagkalainlaing mga ahensiya sa gobyerno nga magtinabangay sa pagsulbad sa suliran sa tubig. (edbarrita@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph