Barrita.
Barrita.File photo

Barrita: Dugang 3,812 ka mga bag-ong abogado

Tipik sa Balaod

Ang resulta sa Bar examinations maoy labing kulba-hinam ug gipaabot sa tanang mga government examination. Kulba sa mga nikuha sa Bar exams, lakip na sa ilang mga ginikanan ug minahal sa kinabuhi. Ang makapasar sa labing lisod nga pasulit sa gobyerno sa Pilipinas magdala na sa titulo nga Attorney.

Gipagawas kagahapon sa Korte Suprema ang resulta sa 2023 Bar exams nga gipahigayon niadtong Septiyembre 17, 20 ug 24, 2023 sa 14 ka mga testing centers sa tibuok nasod. Mao kini ang ikatulo nga digitized Bar exams nga nagsugod sa 2020-2021 Bar exams.

Miabot sa 3,812 o 36.77 porsyento sa 10,387 ka mga examinees ang nipasar sa 2023 Bar exams, matod pa sa Korte Suprema. Sa 2022 Bar exams nga gipahigayon sa Nobiyembre 2022, 3,992 ang nipasar sa 9, 183 nga nikuha, sa passing percentage nga 43.47 percent.

Ang labing daghan nga nipasar mao ang sa gidungan nga 2020-2021 Bar exams atol sa Covid-19 pandemic. Miabot sa 8,241 ang nipasar o 72.28 porsyento sa 11,402 nga nikuha sa maong Bar exams kansang chairman mao si Supreme Court Associate Justice Marvic Leonen.

Sa miaging tulo ka Bar exams, lakip sa gidungan nga 2020-2021 Bar exams, nadugangan og 16,045 ka mga abogado ang Pilipinas.

Apan nagpadayon gihapon ang obserbasyon nga kuwang ang mga abogado sa atong nasod. Kini tungod kay di tanan sa mga bag-ong abogado nag-practice sa ilang propesyon.

Daghan sa mga bag-ong abogado gikuha nga mga opisyal sa dagkong mga kompaniya. Ang uban kanila nahimo’ng mga corporate lawyers ug tua lang sa ilang mga opisina, di molaban og mga kliyente atubangan sa mga korte. Ang uban mga magpapatigayon nga nag-atiman sa ilang mga negosyo.

Makasaysayanon ang tuig 2023 kay ning tuiga, duha ka hut-ong sa mga Bar passers ang nanumpa ug nipirma sa Roll of Attorneys. Ang nipasar sa 2022 Bar exams nanumpa didto sa Philippine International Convention Center (PICC) sa Pasay City niadtong Mayo 2, 2023. Ang nipasar sa 2023 Bar exas manumpa karong Disyembre 22, 2023 sa SMX Convention Center Manila sa Pasay City.

Si 2023 Bar Committee Chair ug SC Associate Justice Ramon Paul Hernando miingon nga sayong gipagawas ang nipasar sa Bar exams aron maka-practice gilayon sila sa ilang propesyon inigkahuman sa holidays.

Giatangan usab ang listahan sa mga topnotchers sa Bar exams. Labing menos tulo ka mga topnotcher nahimong pangulo sa Pilipinas sama nila ni Manuel Roxas, Diosdado Macapagal ug Ferdinand Marcos. Si kanhi presidente Don Sergio Osmena Sr. second placer sa Bar exams. Ang topnotcher sa 2023 Bar exams mao si Ephraim Porciuncula Bie sa University of Santo Tomas. (edbarrita@gmail.com)

Related Stories

No stories found.
SunStar Publishing Inc.
www.sunstar.com.ph