Grabe na gyud kaayo ang kainit sa adlaw karong panahuna. Matod pa sa usa ka pasiaw, dihay usa ka tawo nga nagpa-deliver og halo-halo. Apan tungod sa grabeng kainit sa adlaw, pag-abot binignit na. Mora’g salin pa sa Semana Santa kining estoryaha.
Nangliki na ang yuta sa mga daruhan ug mga basakan nga nakaapekto sa atong mga mag-uuma. Nibalik na sab ang pawong-pawong sa agas sa tubig sa atong mga gripo. Duna nay kapasangilan ang Metropolitan Cebu Water District sa kanihit sa tubig. Apektado na gani ang mga water refilling stations.
Hasta ang klase sa mga estudyante sa elementarya ug high school apektado na sa kainit sa adlaw. Ang forecast sa Pagasa Visayas nag-ingon nga moabot sa 38 degrees Celsius ang heat index sa Cebu niadtong Sabado. Delikado kon moabot ang heat index sa 42 ngadto sa 51 degrees Celsius.
○ ○ ○
Niadtong Biyernes, gisuspenso ni Cebu Gov. Gwendolyn Garcia ang klase gikan sa kindergarten ngadto sa Grade 12 sa tanang public schools sa tibuok lalawigan sa Sugbo aron malikay ang mga estudyante sa epekto sa grabeng kainit.
Giluwatan sa gobernador ang Memorandum 22-2024 nga nagmando sa pagsuspenso sa mga klase tungod sa taas nga heat index ug nagmando sa Department of Education (DepEd) Cebu Province ug mga mayor sa istriktong pagpatuman sa maong memorandum.
Ang 2023-2024 school year gikatakda nga matapos sa Mayo 31. Sa karaan nga school year, ang mga klase matapos sa buwan sa Marso. Makalikay na unta ang mga estudyante sa grabeng kainit. Resulta na ni sa tagna-tagna nga lagda sa DepEd.
○ ○ ○
Wa klaroha sa maong memo kon ang ang face to face (F2F) classes ray gisuspenso. Kon wa gyuy klase, way alternative delivery modes sama sa online, distance learning ug modular printed modes, makahigayon ang mga estudyante sa pasigig duwa sa ilang mga gadget ug pagpalupad og tabanog.
Apan nag-una ang 22 ka mga lungsod ug syudad sa Sugbo sa pagsuspenso sa F2F classes. Mao kini ang mga lungsod sa Asturias, Badian, Balamban, Compostela, Consolacion, Cordova, Liloan, Medellin, Minglanilla, Poro, Ronda, San Fernando, San Remigio, Sibonga, Tabogon, Tabuelan, Tuburan ug ang mga syudad sa Lapu-Lapu, Naga, Talisay ug Toledo.
Gisuspenso sab ang F2F classes sa siyudad sa Mandaue. Samtang sa Cebu City, gitugyan ni Mayor Michael Rama ngadto sa mga principal ang gahom sa pagsuspenso sa mga klase.