Barrita: Firing squad batok sa mga kurakot

Tulo ka konbiktado gipahamtangan sa silot sa kamatayon pinaagi sa firing squad. Sa dihang nag-atubang na sa firing squad, ang unang konbiktado misinggit og “tsunami.” Nana­gan ang mga sakop sa firing squad. Nakaeskapo siya.

Ang ikaduha misyagit og “earthquake.” Nanagan na sab ang mga sakop sa firing squad ug nakaeskapo siya. Ang ikatulo nakahunahuna sa pagsinggit og “fire.” Nagdungan sa pagkablit sa ilang pusil ang mga sakop sa fi­ring squad. Patay ang ikatulo.

Nakahinumdom ko ning ma­ong pasiaw tungod niining balaudnon nga gisang-at sa usa ka magbabalaod nga magpahamtang sa silot sa kamatayon pinaagi sa firing squad niadtong makonbikto sa pangurakot, plunder ug malversation of funds.

○ ○ ○

Apan di kaha maunay ang mga magbabalaod niini? Sila man gud pirmi ang starring kon hisgotan na gani ang pa­ngurakot sa gobyerno. Lab-as pa kaayo sa atong panumdoman ang P10 bilyones nga pork barrel scam ni Janet Napoles.

Ang House Bill (HB) 11211, ang giproponer nga “Death Penalty for Corruption Act,” magpahamtang sa silot nga death by firing squad sa tanang mga opisyales, gikan sa Presidente ngadto sa mga opi­syales sa barangay nga makonbikto sa pangurakot.

Si Kongresista Khymer Adan Olaso (1st District, Zamboanga City), miingon sa explanatory note sa maong balaudnon nga gitumong kini sa pagpahunong sa pangurakot ug pagpahamtang sa labing bug-at nga silot niadtong makalapas.

○ ○ ○

Apan dunay angay nga bantayan ang maong balaudnon. Kon mapasar kining balaod, ma-repeal ang Republic Act (RA) 9346, nga nag-abolish sa silot sa kamatayon ug ubang mga balaod nga sukwahi niini.

Ang RA 9346 nga nahimong balaod niadtong Hunyo 24, 2006, nagdili sa pagpahamtang sa silot sa kamatayon. Gi-repeal niini ang RA 8177 (Death by Lethal Injection) ug RA 7659 (Death Penalty Law). Gihulip sa death penalty mao ang reclusion perpetua (40 ka tuig nga pagkapriso) sa mga krimen ubos sa Revised Penal Code (RPC) ug life imprisonment sa mga krimen nga di ubos sa RPC.

Daghan nang mga pagsuway sa mga magbabalaod sa pagpabalik sa silot sa kamatayon. Apan pakyas silang tanan. Sa akong tan-aw, kining maong balaudnon mao ang labing ula­hing pagsuway sa pagpa­balik sa silot sa kamatayon.