Matag administrasyon sa kagamhanang nasyonal ug lokal adunay priorities sa mga programa ug mga proyekto nga ilang unahon sa pag-atiman.
Daghan ang mga proyekto ni kanhi Gobernador Gwen Garcia. Usa niini ang “Suroy-Suroy Sugbo.”
Gitumong kini sa pag-agni sa mga turista sa pagbisita sa mga kalungsoran sa Lalawigan sa Sugbo. Apan nisaka ba ang gidaghanon sa mga turista nga niadto sa mga kalungsoran sa Sugbo, gawas sa Oslob, Moalboal, Badian ug Bantayan?
Apan ingon sa nataligam-an ang kahimtang sa provincial hospitals nga gipadagan sa Kapitolyo.
Daghang nireklamo sa kakuwang sa mga doktor, nurses ug uban pang mga hospital personnel, ingon man mga ekipo, mga medisina ug tambal.
○ ○ ○
Imbes nga matambalan ang mga pasyente sa provincial hospitals, ipadala na lang sila sa Vicente Sotto Memorial Medical Center (VSMMC) sa Dakbayan sa Sugbo. Nisamot ang pagtipun-og sa mga pasyente sa VSMMC.
Ang pagpalambo sa mga hospital sa probinsya mao karon ang gihimong priority sa bag-ong pangulo sa Lalawigan sa Sugbo, si Gobernador Pam Baricuatro.
Nagsugod na siya sa pag-hire og mga doktor ug mga medical personnel sa provincial hospitals. Apan nibutho ang balaudnon nga gipasaka ni Cebu Fifth District Rep. Duke Frasco nga maghimo sa Cebu Provincial Hospital sa Dakbayan sa Danao nga usa ka national government-run Level 2 hospital. Ninunot sa priority ni Gob. Pam Baricuatro.
○ ○ ○
Ang matag administrasyon lainlain og priority. Apan wa kini magpasabot nga dili na gyud mausab.
Ang makantalitahon nga komentaryo ni Gob. Pam nagkanayon, “Sa una ga sige ni sila og suroy-suroy karon nag sige na man og sakay-sakay… Sakay-sakay pa more.”
Kini si Gob. Pam duna sab ni siya’y iyang brand of humor. Niduskurso ni siya sa Siyudad sa Carcar sa State of the City Address ni Mayor Patrick Barcenas.
Pagkupot gyud ni Gob. Pam sa microphone, niingon siya sa mga tawo, “Ayaw mo kahadlok. Di ni nako hulbuton.”
Sa di pa ta makalimot. Daghang mga drayber sa taxi nga nireklamo niining tag P20 nga kolektahon inig sud nila sa Cebu South Bus Terminal.
Pirmi silang magkalalis sa pasahero nga maoy ilang pabayron. Ang ilang pangutana, “Kanus-a ni wagtangon?”