Sa panahon sa mga katalagman, ang madalidali nga ayuda nga mahatag sa gobiyerno sa mga biktima mao ang pipila ka kilong bugas ug pipila ka lata sa sardinas.
Sa ubang mga lugar, ordinaryo ra kaayo ang sud-an nga manok bisaya. Ang espisyal mao ang sardinas nga pinalit sa lungsod.
Sa popular kaayong pahinumdom kaniadto sa telebisyon, starring ni anhing Rudy Gamboa isip mayor, sardinas ang gipakaon sa mayor kay “nakalugsong man.”
Pero di ni mao ang sardinas nga atong hisgutan. Bahin kini sa mga pasahero sa mga pangpublikong sakyanan nga naghuot, murag sardinas.
Gani, mas luag pa man tingali ang mga sardinas sulod sa lata kay naglabi na man lang ang tomato sauce.
○ ○ ○
Gilusad sa Land Transportation Franchising and Regulatory Board (LTFRB) ang “Anti-Sardinas” campaign aron mamenusan ang paghuot sa mga pasahero sa mga bus, jeepney ug sa ubang mga public utility vehicles (PUVs) nga sobra sa passenger limit.
Subay kini sa direktiba ni Department of Transportation Secretary Vince Dizon aron komportable ang mga pasahero.
Kausa lang, nisakay ko og modern PUJ gikan sa Siyudad sa Carcar. Nagbarog ko gikan sa Carcar hangtod sa Siyudad sa Sugbo. Naghuot ang mga pasahero nga nagbarog lang.
Nisamot pa gyud kay nabara mi og kapin sa usa ka oras sa kahuot sa trapiko kay dunay prosesyon sa pista sa Pitalo, San Fernando.
Nakuhaan og pila ka buok kay diha’y mga pasahero nga wa kaagwanta ug nanganaog.
○ ○ ○
Gipahinumdoman ang mga PUV operators sa pagtuman sa passenger capacity limits nga gisitar sa LTFRB ug sa Department of Transportation.
Ang traditional jeepneys gitugotan nga makapasakay og 12 ngadto sa 32 ka mga pasahero, depende sa gi-specify sa manufacturer.
Ang modern jeepneys mahimong mopasakay og 12 ngadto sa 32 ka pasahero nga maglingkod ug lima ka pasahero mga magbarog sa matag metro kwadrado.
Samtang ang mga bus makapasakay og 50 o kapin ka mga pasahero ug lima ka pasahero nga magbarog sa matag metro kwadrado.
Way tugotan nga pasaherong magbarog sa lagyo nga biyahe. Ang kalapasan niini mosangpot sa multa o sa rebukasyon sa mga prangkisa.
Kon tinud-on ang pagpatuman niini sa LTFRB. daghan sa mga PUV ang di na makabiyahe.