Sa udtong tutok sa Hunyo 30, moasumer sa katungdanan ang mga bag-ong napili ug nasublian nga mga opisyales sa tibuok nasud, gikan sa Senado, Kongreso ug lokal nga kagamhanan.
Dinhi sa lalawigan sa Sugbo, 31 ka mga mayor ang nagpabilin sa ilang mga puwesto, pito kanila walay mga kaatbang.
Mahinungdanon ang eleksyon tungod lagi kay ang mga politico gikomparar man sa lampin sa bata nga kinahanglan ilisan matag karon ug unya.
Matod sa panultion, “Politicians and diapers must be changed often, and for the same reason.”
Gipasangil kini ngadto sa Amerikanhong humorist ug magsuswat nga si Mark Twain.
Apan sumala sa reuters.com, ang maong panultion wa nila makit-i sa mga sinuwat ni Mark Twain.
Lagmit tinumo-tumo lang, pero nindot paminawon.
○ ○ ○
Samtang dunay mga lider nga nasublian, duna say mga beterano ug mga lig-on nga lider nga nangapukan sa puwesto.
Sayod na kita nga bag-o na ang atong gobernador sa lalawigan sa Sugbo ug mayor sa syudad sa Sugbo.
Ang beterano ug incumbent nga si Gobernador Gwendolyn Garcia gipilde ni Pam Baricuatro nga mao pay pagsud sa politika.
Samtang si Konsehal Nestor Archival Sr. nga dugay nang nag-alagad isip konsehal midaug batok sa incumbent nga si Cebu City Mayor Raymund Garcia ug kanhi Mayor Mike Rama.
○ ○ ○
Unsa kahay mga kabag-ohan ug kausaban nga atong mapaabot? Si Baricuatro mipahayag na nga dunay mga programa ni Governor Gwen nga di niya ipadayon sama sa Pasigarbo sa Sugbo nga mogasto og kapin sa P250 ka milyon matag higayon ug ang Suroy-Suroy Sugbo.
Gidasonan kini ni Ace Durano, kanhi kalihim sa Turismo nga usa sa iyang gikuha nga consultant.
Apan suwerte si Governor Pam, kay matod pa ni Governor Gwen, duna siyay gibilin nga kapin sa P6 ka bilyon nga cash sa Kapitolyo. Way utang ang Kapitolyo ug nag-awas-awas pa ang cash.
Sa bag-ong liderato sa Cebu City Hall, ang una natong nahibaw-an nga gustong sulbaron ni Mayor Archical uban ni Governor Pam ang kahimtang sa kapin sa 5,000 ka mga pamilya nga nagpuyo sa mga lote sa Kapitolyo ubos sa 93-1 ug sa pagpadali sa paghuman sa 73.7 ka kilometro Metro Cebu Expressway aron pagsulbad sa trapiko sa Metro Cebu.