Barrita
Barrita

Barrita: King cobra

Tikdul-Tikdol

Naukay ang mga tawo sa mga taho nga na­kit-an ang king cobra, ang labing dako nga venomous o malala nga cobra o banakon sa tibuok kalibutan, sa mga bukirang bahin sa lungsod sa Badian, San Fernando ug Dalaguete ug sa Barangay Busay sa siyudad sa Sugbo.

Samtang, ang mga manindahay sa mga merkado publiko sa siyudad ug lalawigan sa Sugbo dugay na nga nag-antos sa laing matang sa cobra. Mao kini ang kubra kada adlaw sa mga nag-five-six ug sa nagpautang nga mga “Turko.”

Dihay duha ka tawo nga na­ngayam sa lasang. Ang usa nali­bang ug napaakan ang pikoy sa cobra. Gihangyo niya ang iyang kauban nga motawag og doktor kon unsay angay buhaton. Ang doktor miingon nga ipasupsop ang venom. Matod pa sa napaakan, “Unsay ingon sa doctor, pre?” Ang iyang kauban mi­ingon, “Mamatay gyud ka, pre.”

○ ○ ○

Ang king cobra di endemic sa lalawigan sa Sugbo. Busa, nipasidaan ang kapulisan sa katawhan nga di motuo sa mga fake news nga kini gipang­hug sa helicopter. Mokamang ug molangoy baya nang mga bitin. Giingon nga nanggawas ang mga king cobra kay karon ang ilang mating season.

Matod pa sa mga eksperto ang king cobra di mopaak sa tawo gawas kon kini maapiki, matumban. Busa, kon makaki­ta ka og bitin, ayaw og paduol, distansiya balig napu­lo ka metros. Delikado ang mapaakan sa king cobra kay makamatay ang venom niini.

Ang venom sa king cobra usa ka neurotoxin. Ang neuroto­xin i-inject sa biktima pinaagi sa duha ka mga tango sa king cobra. Inig lamay sa neuroto­xin, mohunong ang gininhawa ug pinitik sa kasingkasing sa tawo nga mapaakan, hangtod nga siya mamatay.

○ ○ ○

Sanglit di man endemic ang king cobra sa Sugbo ug talagsa ra man nga makadungog kita nga dunay napaakan sa maong bitin, way supply sa antivenom ang mga ospital sa gobyerno dinhi sa Sugbo.

Kon duna man gani, unya di pa magamit ug hapit na mo-expire, ipadala kini ngadto sa mga dapit nga gikataho nga daghan ang napaakan sa cobra. Apan bisan pa niini, a­­ngay gihapon nga mag-stock og antivenom ang mga hospital sa gobyerno dinhi sa Sugbo.

Si Dr. Beethoven Bongon, toxicologist sa Vicente Sotto Memorial Medical Center (VSMMC), niingon nga duna silay stock sa antivenom nga polyvalent, epektibo batok sa pinaakan sa king cobra, Phi­lippine cobra ug Samar cobra.

Related Stories

No stories found.
SunStar Publishing Inc.
www.sunstar.com.ph