Usa ka Pinoy naabtan sa polis nga mangihi unta sa paril daplin sa karsada sa usa ka siyudad sa laing nasod.
Gipasakay siya sa patrol car ug gidala sa usa ka lugar nga nindot ug hapsay kaayo ang mga tanom ug daghang mga buwak.
Ingon sa polis, “Pwede kang mangihi dinhi kay Philippine Embassy ni.”
Ang mga Pinoy matod pa magpataka lang og pangihi. Imbis “against the law” ang pagpangihi, ang mga Pinoy mangihi “against the wall.”
Dinhi sa Siyudad sa Sugbo, ang City Ordinance 1361 nagdili sa pagpangluwa, pagpangihi ug pagpagawas sa hugaw sa publikong mga dapit.
Ang masakpan pahamtangan og P500 nga compromise fee o community service alang sa unang kalapasan ug multa gikan sa P1,000 ngadto sa P5,000 o pagkapriso gikan sa usa ngadto sa unom ka mga buwan alang sa sunod nga mga kalapasan.
○ ○ ○
Apan di ko motuo nga ang pagpataka og pangihi usa ka naandan nga taras sa mga Pinoy.
Resulta kini, sa way pagduda, sa kakuwang sa mga confort room (CR) ug urinals sa publikong mga lugar nga daghang mga tawo ang magpunsisok, sama sa mga bus terminal.
Mas maayo pa gyud kon libre. Sama sa gibuhat ni Cebu Gov. Pamela Baricuatro sa pagpabukas sa libreng mga CR sa Cebu South Bus Terminal (CSBT) ug Cebu North Bus Terminal.
Apan kinahanglan sab nga i-rehabilitate ug limpyohan ang libreng mga CR. Naay limpyo nga CR pero mobayad ka’g P10 kada pangihi. Uroy kon bus-awon ka.
Matod pa ni Provincial Administrator Joseph “Ace” Durano, ang Mister Loo, nga nag-operate sa CR, mokolekta og P33,000 kada adlaw sa CSBT lang. Niabot na ni og P7 milyones gikan sa pagsugod sa lima ka mga tuig nga kontrata sa Dec. 21, 2023.
○ ○ ○
Duna diay kuwarta sa CR. Ang kuwestiyon mao kon nakakuwarta ba ang Kapitolyo niini.
Sumala pa ni Gov. Baricuatro, singo porsyento ra ang bahin sa Kapitolyo. Ubos sa kontrata, makabahin lang og P1,650 ang Kapitolyo kada buwan.
Ang Mr. Loo dunay proposal nga mohatag og P1 ka milyon alang sa rehabilitation sa mga public CR sa mga terminal.
Ang counter proposal sa Kapitolyo, matod pa ni Gov. Baricuatro, nga libre ang paggamit sa CR sa tulo ka mga buwan samtang giayo ang publikong mga CR.