Gipirmahan ni Presidente Ferdinand “Bongbong” Marcos Jr., ang usa ka balaod alang sa libreng legal aid sa tanang mga aktibo ug retiradong mga sakop sa militar, kapulisan ug ubang mga unipormadong kawani sa gobiyerno nga nag-atubang og mga kasong kriminal, sibil ug administratiba kalabot sa ilang katungdanan.
Mao kini ang Republic Act No. 12177, ang Free Legal Assistance for Military and Uniformed Personnel (MUP) Act, nga gipirmahan sa pangulo niadtong Abril 15, 2025, ug gitumong sa paghatag og libreng serbisyo legal sa mga MUP nga may mga kasong service-related. Lakip niini ang mga opisyal, enlisted ug uniformed personnel sa Armed Forces of the Philippines, Bureau of Fire Protection, Bureau of Jail Management and Penology, Philippine Coast Guard, Bureau of Corrections, Philippine National Police ug Hydrography Branch sa National Mapping and Resource Information Authority.
Ang maong mga ahensiya kinahanglan nga mopalig-on sa ilang mga in-house legal office.
Gimanduan sab sila sa pagsumitir sa Department of Budget and Management sa bag-ong organizational structure and staffing pattern subay sa tukmang gidaghanon sa mga legal officers alang sa mga uniformed personnel.
Ubos sa bag-ong balaod, libre ang serbisyo legal alang sa mga MUP nga nag-atubang og service-related complaint atubangan sa prosecutor’s office, korte, quasi-judicial or administrative body o sa bisan unsang competent body o tribunal.
Sagad nga ang mga MUP magpatambag sa ilang legal office kon unsay buhaton sa ilang giatubang nga mga kaso nga may kalambigitan sa ilang trabaho. Apan ang mahitabo, mokuot sila sa ilang bulsa aron pagkuha og abogado nga molaban kanila.
Ang mga retirado ug mga honorably discharged ingon man separated nga MUP makapahimulos sab sa libreng serbisyo legal sa mga service-related cases samtang diha pa sila sa serbisyo.
Ang libreng legal service naglakip sa legal representation sa mga kasong sibil, kriminal o administratiba, legal advice o consultation, preparasyon sa mga pleadings, motions, memoranda ug ubang mga legal forms ug mga dokumento, bayranan sa korte ug pagnotaryo sa mga dokumento. Apan ang libreng legal aid dili ikahatag kon adunay conflict of interest.
Ang PNP niingon nga ang bag-ong balaod dugay na nga gipaabot ug gikinahanglan sa pagpanalipod sa mga unipormadong kalalakihan ug kababayen-an nga nagrisgo sa ilang kinabuhi aron magpadayon nga luwas ang atong mga komunidad.
Si PNP Chief Police Gen. Rommel Francisco Marbil niingon, “It is a moral commitment of the government to protect those who protect the nation. It sends a clear message that our public servants in uniform are not alone when doing their sworn duties. They now have the full backing of the State.” (edbarrita@gmail.com)