NIDAOG si kanhi Presidente Rodrigo Duterte isip mayor sa Davao City sa miaging eleksiyon. Apan gipadala siya ngadto sa The Hague, Netherlands aron pag-atubang sa kasong crimes against humanity nga gipasaka batok kaniya sa International Criminal Court (ICC).
Ang termino sa mga opisyales nga napili sa miaging eleksiyon magsugod sa udtong tutok sa Hunyo 30, 2025. Apan makahural ug makaasumir ba si Duterte isip mayor sa Davao City nga gidetinir man siya sa ICC?
Ang Department of the Interior and Local Government (DILG) niingon sa usa ka position paper ni Undersecretary for External, Legal and Legislative Affairs Romeo Benitez nga way balaod sa Pilipinas nga nag-disqualify ni Duterte nga manumpa sa katungdanan bisan kon nadetinir siya didto sa ICC.
Usa ka rikisito ang pagpanumpa sa katungdanan ubos sa Konstitutsyon, sa Administrative Code ug sa Local Government Code aron ang usa ka opisyal makalingkod sa katungdanan.
Si Benitez niingon nga ang Section 41 sa Administrative Code naghatag og gahum sa pag-administer sa oaths of office ngadto sa presidente, bise presidente, mga senador ug kongresista ug mga kalihim sa Senado ug House of Representatives, mga sakop sa hudikatura, sakop sa Cabinet, gobernador, bise gobernador, mayor sa siyudad ug lungsod, notaryo publiko ug kapitan sa barangay.
Sanglit kinahanglan man ang personal appearance kay papirmahan man ang oath of office atubangan sa administering officer, si Duterte mahimong manumpa atubangan sa ambassador o consul sa Pilipinas didto sa Netherlands.
Kon makapanumpa siya sa katungdnaan isip mayor, makalingkod ba siya sa puwesto nga detinido man siya sa The Hague? Si Benitez niingon nga ang iyang pagkadetinir maghimo kaniya nga “physically and legally temporarily incapable of performing his duties and functions as mayor.”
Ang Section 46 sa Local Government Code, nagkanayon nga ning higayuna ang bise mayor awtomatik nga moasumer isip acting mayor. Sa kaso ni Duterte, ang mahimong acting mayor mao ang iyang anak nga si Vice Mayor-elect Sebastian Duterte. Samtang ang mahimong bise mayor mao ang numero uno nga sakop sa
Sangguniang Bayan, subay sa Administrative Order No. 15 series of 2018.
Kon dili makapanumpa si Dutere sa katungdanan, mahimong bakante ang iyang puwesto subay sa Section 11 sa Batas Pambansa No. 881, ang Omnibus Election Code.
Kini nagkanayon, “The office of any official elected who fails or refuses to take his oath of office within six months from his proclamation shall be considered vacant, unless said failure is for a cause or causes beyond his control.”
Tungod sa permanent vacancy, ang bise mayor maoy mahimong mayor ug ang numero unong sakop sa sanggunian maoy mahimong bise mayor subay sa Section 44 sa Local Government Code.
(edbarrita@gmail.com)