Gipagawas sa Civil Service Commission (CSC) ang CSC Resolution 2500229 niadtong Marso 6, 2025 nga nag-ingon nga ang mga gradwado sa senior high school kuwalipikado na alang sa entry-level nga mga posisyon sa gobiyerno.
Makatrabaho na sila sa gobiyerno. Tubag na ba kini sa nag-ingon nga ang K+12 program sa Department of Education (DepEd) naglangaylangay lang sa pag-eskuwela sa kabataan?
Kaniadto modiretso sa kolehiyo ang mga estudyanre human sa upat ka tuig sa high school, ug kon makatapos sa kolehiyo, makatrabaho na.
Ang CSC Resolution 2500229 nag-update sa qualification standards sa first-level o sub-professional nga mga posisyon sa gobiyerno.
Naglakip kini na sa Grade 12 graduates, Grade 10 completers gikan sa tuig 2016 pataas ug technical-vocational (tech-voc) track graduates nga adunay Tesda National Certificate (NC) II.
○ ○ ○
Ang mga posisyon nga i-offer sa mga K-to-12 ug tech-voc graduates subay sa CSC Resolution 2500229 mao ang clerical ug custodial nga posisyon.
Apan sa di pa magluksolukso sa kalipay ang mga K+12 graduates, magkinahanglan pa sila sa requirements sama sa civil service eligibility, training ug experience.
Bahin sa civil service eligibility, ang CSC niingon nga 46,470 ra o 14.57 porsyento sa tanang nikuha ang ningpasar sa Career Service Examination–Pen and Paper Test (CSE-PPT) nga gipahigayon sa buwan sa Marso.
Gamay ra’g labaw sa 14.40 porsiyento nga ningpasar sa exam nga gipahigayon sa Agusto sa 2024.
Ang CSC mopahigayon sa CSE-PPT kaduha sa usa ka tuig – sa Marso ug Agusto.
Ang mopasar sa professional level exams kawalipikado alang sa technical, scientific ug managerial position sa gobiyerno kon makahuman og upat ka tuig sa kolehiyo.
Ang pasado sa subprofessional level kuwalipikado sa clerical ug custodial service.
○ ○ ○
Ang pangutana, andam ba ang mga gradwado sa senior high school sa pagkuha ug pagpasar sa civil service exam? Makasubo ang ubos kaayo nga passing rate nga gipakita sa niaging civil service exam.
Gani, ang kadaghanan sa ningkuha niini mga gradwado na sa kolehiyo.
Sumala sa sa Philippine Statistics Authority (PSA), kapin sa 18 ka milyon ka mga Pilipino gikan sa edad nga 10 ngadto sa 64 anyos mga “functional illiterates,” duna pay problema sa saktong pagsabot.