SunStar Barrita
SunStar Barrita

Barrita: Mga itlog sa Bantayan miminos, apan ‘oversupply’?

Tikdul-Tikdol

Sukad pa sa panahon sa kakaraanan, ug hangtod karon, wa pa masulbad ang pangutana kon hain ang nag-una, ang manok o ang itlog. Ang tanang manok gikan sa napusa nga itlog. Ang itlog gikan sa manok. Gitawag kini nga “chicken-and-egg question.”

Gilalisan kining maong butang sa mga tubaan ug bisan sa hamiling katilingban. Wa gyu’y nakasulbad niini. Bisan ang philosophers sama nila ni Aristotle ug uban pa. Unsaon man nimo pagsulbad nga ang itlog gikan man sa manok, ug ang manok gikan man sa itlog.

Nahinumdom lang ko sa tiguwang lalaki nga nasuko kay gilabay-labayan lang sa waitress sa usa ka restaurant. Kadugayan, niduol ang waitress ug nangutana sa iyang order.

“Duha ka itlog, Miss,” matod sa tiguwang. “Unsay gusto nimo, Sir. Scrambled, sunny side up, soft-boiled, hard-boiled?” Ingon sa tiguwang, “Taym pa, Miss. Kawta na lang ang akong itlog.”

○ ○ ○

Apan makapahimuot nga ang nitumaw karon nga chicken-and-egg question bahin sab sa itlog. Ang egg produ­cers sa isla sa Bantayan miingon nga nihinay ang ilang egg production. Apan miingon sila nga dunay “oversupply” karon sa itlog dinhi sa Sugbo.

Mokabat sa duha ka mil­yon ka itlog ang production sa isla sa Bantayan sa matag adlaw. Apan matod pa ni Joseph Allan Pastoril, pangulo sa Bantayan Island Livestock and Hog Raisers Association, mikunhod na kini. Wa siya’y numero nga gihisgotan.

Ang gipasanginlan nga hinungdan mao ang epekto sa grabeng kainit sa panahon nga dala sa El Niño phenomenon. Gani, matod pa ni Pastoril, 15 porsyento sa 4,500 ka mga trabahante sa poultry farms sa isla sa Bantayan nawad-an na sa ilang mga trabaho.

○ ○ ○

Apan nganong duna may oversupply sa itlog dinhi sa Sugbo? Matod pa ni Pastoril, nihinay ang konsumo sa itlog tungod kay sa sobrang kainit, nasuspenso ang face-to-face nga klase sa mga tinun-an sugod sa Abril. Nagbaha sab ang mga itlog gikan sa Mindanao.

Matod niya, dugay na ang ilang kompetisyon sa egg producers sa Mindanao kay hinay ang demand sa itlog sa Mindanao. Ang nakalahi lang sa itlog gikan sa Mindanao kay dali kining madaot kay old stock, matod niya, ang ilang ipadala sa Sugbo.

SunStar Publishing Inc.
www.sunstar.com.ph