Gitugotan sa Commission on Elections (Comelec) ang mga pinili nga mga opisyales sa barangay ug Sangguniang Kabataan (SK) nga mosalmot sa mga partisan political and campaign activities alang sa 2025 elections.
Sa ato pa, ang mga pinili nga opisyales sa barangay ug sa SK mahimo na nga moapil sa pangampanya sa ilang mga kandidato.
Dili na sila mabalaka nga mag-atubang sa mga kalapasan sa election laws bahin sa pangampanya. Nahimutang kini sa Comelec Minute Resolution 24-1001 nga nagkanayon, “the Comelec resolves to exclude elected barangay and SK officials from the coverage of the prohibition against intervention in any election campaign or engagement in partisan political activities.”
Ang maong resolusyon nagsubay sa desisyon sa Korte Suprema nga nag-ingon nga ang pagdili sa pag-apil sa mga politikanhong kalihukan atol sa election period alang lang sa mga opisyales ug kawani sa civil service, walay labot ang mga elected officials.
Ang Comelec niingon nga dunay limitasyon ang maong exemption sama sa pagdili sa pagpangayo og amot sa ilang mga sakop ug sa dili pagbuhat sa mga butang nga gidili ubos sa Batas Pambansa Blg. 881, ang Omnibus Election Code [OEC], labi na sa Section 261 (i) niini.
Ang maong probisyon nagkanayon, “Intervention of public officers and employees. - Any officer or employee in the civil service, except those holding political offices; any officer, employee, or member or the Armed Forces of the Philippines, or any police force, special forces, home defense forces, barangay self-defense units and all other para-military units that now exist or which may hereafter be organized who, directly or indirectly, intervenes in any election campaign or engages in any partisan political activity, except to vote or to preserve public order, if he is a peace officer.”
Wa na say labot sa pagdili sa pangampanya ang mga job order (JO) ug contract of service (COS) workers sa gobiyerno.
Gitawag kini sila nga mga non-civil service personnel sa kagamhanan.
Matod sa Comelec, wala hisguti ang mga JO ug COS workers sa pagdili sa pangampanya ug mga kalihukang politikal ubos sa Article IX-B, Section 2(4) sa 1987 Constitution ug sa Section 261(i) sa OEC.
Ang Article IX-B, Section 2(4) sa 1987 Constitution nagkanayon, “No officer or employee in the civil service shall engage, directly or indirectly, in any electioneering or partisan political campaign.”
Apan nipasidaan ang Comelec nga mahimong manubag sa balaod ang si bisan kinsa nga mogamit sa pundo sa publiko sa pagpatrabaho sa mga JO ug COS alang sa katuyoan sa pangampanya ug partisan political activity. - edbarrita@gmail.com