Wala pay balaod nga gipanday sa Kongreso ingon man lagda nga giluwatan ang Korte Suprema bahin sa pagmugna sa usa ka paralegal system sa Pilipinas. Apan sa miaging eleksyon, ang mga kandidato ug mga partido nag-hire og mga estudyante sa abogasiya aron moalagad isip mga paralegal atol sa eleksyon.
Ang University of the Philippines (UP) Law Center adunay Paralegal Training Program sukad pa sa 2014. Ang makasulod sa maong program mao kadtong labing menos nakahuman sa kolehiyo.
Gitudloan ang mga nisalmot sa maong training program sa mga balaod, mga lagda sa korte ingon man ethical standards sa mga sakop sa hudikatura, sa mga abogado ug mga nag-alagad sa serbisyo sibil.
Gawas sa mga nakatapos sa paralegal training, duna pay daghang mga gradwado sa abogasiya nga mahimong magamit nga mga paralegal, sama sa pagsuwat sa mga yano nga mga demand letters, mga affidavits ug uban pa.
Ang paralegal service sa Bureau of Jail and Management and Penology (BJMP) nakatabang sa pagpaluag sa mga bilangguan sa tibuok nasod.
Sa pagpatuman gud sa illegal drugs war sa miaging pangulo, daghan ang nangasikop labot sa illegal nga drugas ug naghuot ang mga prisohan.
Sa miaging buwan sa Abril, ang BJMP mitaho nga ang jail congestion miabot og 298 porsyento sa 484 ka mga prisohan sa tibuok nasod nga niadtong panahona adunay 115,791 ka mga binilanggo.
Sumala sa Department of the Interior and Local Government (DILG), ang paralegal service sa BJMP nakatabang sa pagpagawas sa 85,183 ka mga tawo nga gitawag nga mga persons deprived of liberty (PDLs), mga piniriso, gikan sa Hunyo sa 2024 hangtod sa Mayo 2025.
Matod pa sa DILG, 11,139 PDLs ang nakagawas kay nahatagan og good conduct time allowance (GCTA), 8,280 ang gipagawas sa prisohan aron moagi sa probation, 23 ang parolado ug 8,825 ang nakagawas kay nakapiyansa.
Samtang 7,431 ka mga PDLs ang naabsuwelto sa ilang mga kaso, 16,311 ang gibuhian human makaserbisyo sa hingpit sa ilang sentensiya, 340 ang miagi sa community service imbis mapriso ug 3,570 ang gibuhian pinaagi sa recognizance.
Ang DILG miingon nga 15,085 ka mga PDLs ang gibalhin ngadto sa Bureau of Corrections, sa mga provincial jails, mga drug treatment centers ug youth detention facilities.
Mokabat sa 5,667 ka mga kaso ang permanente nga gi-dismiss, samtang 6,342 ka mga kaso ang provisionally dismissed.
“The BJMP paralegal program is a key intervention aimed at addressing jail congestion, helping qualified PDLs gain timely access to legal remedies for early release,” nagkanayon ang pamahayag sa DILG. (edbarrita@gmail.com)