ANG mga politiko gus-tong magpabilin sa pu-westo aron ilang ma-padayon ang mga proyekto nga ilang nasugdan.
Mao na nga bisan pa kon napupos na ang ilang mga termino, papulihon ang bana, asawa o anak, bisan kon supak sa Konstitusyon ang mga political dynasty.
Mao na nga sige sab og suway ang Kongresso sa pagpataas sa termino sa lokal nga opisyales.
Palugwayan ang ilang mga termino aron mahuman ang ilang mga proyekto ug mga programa nga nasugdan na.
Kon mag-ilis-ilis ang mga ma-yor ug mga gobernador, way con-tinuity sa ilang mga programa.
Ang pundo mabalhin ngadto sa laing proyekto kay ang matag politiko lainlain man og priority, subay sa ilang mga panaad sa panahon sa kampanya.
○ ○ ○
Sa udtong tutok sa sunod Lunes, Hunyo 30, mobiya na si outgoing Cebu Gov. Gwendolyn Garcia sa Kapitolyo.
Mobanos kaniya si incoming Cebu Gov. Pamela Baricuatro, usa ka political neophyte nga gibayaw sa katawhan sa Kapitolyo sa makabungog nga kapin sa usa ka milyon ka botos.
Apan sa dayon niyang biya sa Kapitolyo, giluwatan ni Governor Gwen ang Memorandum 36-2025, nga nagmando sa provincial treasurer sa pagbutang og mga trust fund aron pagseguro sa pundo ang iyang mga flagship programs bisan kon wa na siya sa Kapitolyo.
Mao ba kini ang “swan song” ni Governor Gwen? Sa estorya man gud sa unang panahon, giingon nga ang swan, kaliwat sa itik ug gansa, moawit sa labing mananoy nga huni sa dayon na niining kamatay isip panamilit bisan pa kon hilom kini sa tibuok niyang kinabuhi.
Apan ang swan song ni Governor Gwen dili huni sa mga dunggan ni incoming Governor Pam. Ang swan song sa outgoing governor sabotahe alang sa incoming governor.
Kay mora’g gipanghiktan na ang mga pundo sa Kapitolyo, di na magamit sa laing proyekto.
Unya, duna pay mga pro-yekto sa outgoing governor nga gipabutangan og trust fund apan wa magustohi sa incoming governor, sama sa Pasigarbo sa Sugbo ug sa Suroy-Suroy Sugbo.
Hinuon, adunay battery of lawyers ang incoming governor mga motuki sa legalidad sa trust fund memorandum.
Kining battery way labot sa battery nga gigamit sa flashlight, mga duwaan ug transistor radio. Gikan ni sa termino sa pundok sa mga kanyon nga gigamit sa gubat.