Sa pagbukas sa sesyon sa Kongreso sa Hulyo 24, 1989, didto sa Batasang Pambansa sa kaulohan, usa ka seminary choir gikan sa syudad sa Sugbo nikanta sa nasudnong awit sa pinulongang Cebuano-Bisaya, imbis sa Filipino, sumala sa taho sa ucanews.com (Union of Catholic Asian News).
Mao kadto ang labing unang higayon nga ang pinulongang Bisaya gigamit sa usa ka okasyong pangpubliko sa kaulohan. Dungan niini, gilusad dinhi sa Sugbo ang anti-Tagalog movement ni kanhi Gobernador Emilio Mario “Lito” Osmena nga mitaliwan niadtong Hulyo 19, 2021. Gikanta sa San Carlos Seminary choir ang nasudnong awit nga hinubad sa Bisaya ni choir director Monsignor Rudy Villanueva. Didto si kanhi Presidente Corazon “Cory” Aquino, nga senador, mga kongresista ug ubang mga dagkong opisyales sa nasud. * Dunay lakang sa konseho sa syudad sa Sugbo nga ibalik ang pagkanta sa Bisaya nga bersiyon sa nasudnong awit sa mga publikong seremonyas. Apan naghuwat kini sa pagtugot sa National Commission for Culture and the Arts (NCCA) aron kini ikapatuman. Suportado kini ni Cebu City Mayor Raymond Alvin Garcia. Sa di pa kita mopadayon, miabot na sa pito ka mga kaso nga nagkuwestiyon sa paglingkod ni Garcia isip mayor ang gi-dismiss sa Office of the Ombudsman. Nagsingabot na ang eleksyon, paningkamot na lang kinsay mapili nga mayor. Matod pa ni Mayor Garcia, ang mga kawani sa Cebu City Hall kaniadto nagkanta sa Cebuano-Bisaya version sa nasudnong awit nga “Yutang Tabunon.” Apan gimanduan sila sa NCAA sa paggamit sa Tagalog version. * Kining Tagalog/Filipino verison, ang “Lupang Hinirang” nga tawgon sab og “Bayang Magiliw” maoy gimando ubos sa “Flag and Heraldic Code of the Philippines.” (Republic Act No. 8491), nga gipasar niadtong Pebrero 12, 1998. Apan nag-una ang mga Sugbuanon sa pagkanta sa Bisaya nga nasudnong awit kay sa Heraldic Code nga nagmando nga kantahon kini sa Filipino. Apan ang mga batid sa mga pinulongan naglalalis pa kon unsa man gyud ang Filipino. Matod pa ni Mayor Garcia, ang Filipino mahimong Tagalog, mahimong Bisaya. Sa Bisaya version, dunay hinubad ni anhing Monsignor Villanueva, anhing Jess Vestil ug ni anhing Wenefredo Seco, ang unang Cebuano language consultant sa Superbalita Cebu. Ang sagad nakong madunggan mao ang Yutang Tabunon nga Jess Vestil version.