Gipahigayon sa Department of Agriculture (DA) didto sa Kapitolyo niadtong Mayo 1 ang pilot testing sa pagbaligya sa tag P20 nga kilo sa bugas humay.
Sanglit nagsingabot ang mid-term elections sa Mayo 12, di kalikayan ang mga pagduda nga pamolitika ni sa administrasyon ug sa naglingkod nga gobernador.
Nilabay na ang eleksyon. Kon pamolitika pa kadto, klarong way epekto kini sa resulta sa eleksyon kay napildi man ang incumbent nga gobernador.
Kon atong tan-awon, limitado ra man sab ang mga tawo nga makapalit sa tag P20 nga kilo sa bugas.
Limitado sab ang gidaghanon sa bugas nga mapalit.
Sa eleksyon, kon ang botante modawat sa kuwarta sa kandidato apan adto mobotar sa kinsay anaa sa iyang dughan, makaingon kita nga gikopras lang ang kuwarta sa kandidato.
Pero di matawag nga gikopras ang bugas kay gibayran man sa mga tawo.
Mas barato lang.
○ ○ ○
Apan daghan ang nangutana kon angay ba kining ipadayon.
Dunay niingon nga di kini sustainable, di molungtad.
Giklaro na kini sa gobyerno nga paliton ang maong bugas og P33 ang kilo gikan sa National Food Authority (NFA) unya ibaligya sa mga beneficiaries sa tag P20 ang kilo – alkanse og P13.
Magtunga ang DA ug ang lokal nga kagamhanan sa P13 – tag P6.50.
Klaro kini nga subsidy, taplan ang alkanse aron matuman ang tag P20 nga kilo sa bugas.
Apan ato kunong kwentahon. Kon pananglit ang P250 milyones nga gastuhon sa Pasigarbo sa Sugbo nga ipahunong ni Governor-elect Pam Baricuatro adto ihapak sa subsidy sa bugas nga P6.50, makapalit ang Kapitolyo og 38.46 ka milyon ka kilong bugas.
Kon pananglit tag 10 ka kilo ra ang mapalit sa kada usa, nagpasabot nga 3.8 ka milyon ka tawo ang makapalit sa baratong bugas.
Apan di man tanan makapalit sa maong bugas, busa mas daghan ang bugas nga mapalit sa mga beneficiaries.
Mahimo pang ilakip kadtong nagdawat sa minimum wage.