Sa usa ka job interview, gihisgutan ang suweldo.
Manager: “Ang imong suweldo magsugod sa daily minimum age. Doblehon ni nato human sa duha ka tuig.”
Aplikante: “Sigi Sir. Mobalik lang ko human sa duha ka tuig. Kanang doble na akong suweldo.”
Bana malipayon nga nitaho sa iyang asawa nga giumentohan ang iyang suweldo.
Asawa: “Ngano gud tawon?”
Bana: “Akong giingnan ang manager nga dunay duha ka kompaniya nga nangita nako. Pero wa nako ingna nga VECO ug MCWD kay wa ta kabayad sa kuryente ug tubig.”
Kon madayon, makapaabot ang tanang mga kawani sa tibuok nasod, gikan sa Aparri ngadto sa Tawi-Tawi, og P200 nga umento sa inadlaw nga minimum wage.
Mao kini ang labing unang legislated wage sa dugay nang panahon.
○ ○ ○
Niadtong Hunyo 4, 2025, giaprubahan sa House of Representatives ang P200 nga umento sa daily minimum wage sa boto nga 171 ang pabor, usa ang supak ug way ni-abstain. Ang Senado nipasar sa ilang bersiyon sa maong balaudnon iadtong Hulyo sa niaging tuig.
Si Trade Union Congress of the Philippines (TUCP) party-list Rep. Raymond Democrito Mendoza niingon nga makasaysayanon ang pag-arobar sa umento sa suweldo.
Mao kini matod niya ang labing unang legislated national wage hike sud sa 36 ka tuig.
Apan kinahanglan pa kining i-reconcile sa bicameral conference committee tungod kay P100 ang umento sa daily minimum wage ang giaprubahan sa Senado, samtang P200 ang giaprubahan sa House of Representatives.
Kon mahapsay na, isumitir kini ngadto ni Presidente Ferdinand “Bongbong” Marcos Jr.
Kon aprubahan sa pangulo, malipay ang mga mamumuo ug tanang mga trabahante sa pribadong sektor.
Sagad man gud, ang Regional Tripartite Wages and Productivity Board (RTWPBs) sa matag rehiyon ang mositar sa umento sa suweldo. Apan subay sa kasinatian, ginagmay ra gyud ang umento sa suweldo nga aprubahan sa RTWPB kay timbangtimbangon pa man nila ang kahimtang sa negosyo ug sa mga mamumuo sa matag rehiyon. Ang mga magpapatigayon pirming supak sa umento sa suweldo.
Naa dayon kanang warning nga malagmit manira ang mga negosyo, pagkawagtang sa mga trabaho ug pagsaka sa presyo sa palaliton.