Usa sa mga kanta nga gitudlo sa among maestra sa Grade One sa Cabadiangan Elementary School nag-asoy bahin sa uhong.
Kini nag-ingon, “Ako si Talamayon, gitanom wala mabuhi. Ako si Uhong-uhong, miturok nga walay binhi. Apan kon dunay dalugdog, nga atong mabati. Ako si Uhong-uhong, moturok sa yuta.”
Niadtong panahuna wa pa madungog ang mushroom culture. Wala pa mahibaw-i kon unsaon pagturok sa uhong kay way liso ang uhong.
Didto sa Cabadiangan, kon magsugod na pagpanugdog ug pagpangilat, manurok na lang ang mga uhong ug libgos ilawom sa kasagingan, kalubihan ug kawayanan.
Ang nindot mao ang libgos kay daghan kaayo og morag magbanig sa yuta. Pagkalami ra ba sa mga uhong ug libgos. Lami kaayong gisahon.
Ug bisan templahan lang og asin, puston sa lunhaw nga dahon sa saging unya lambunan.
Nakahisgot ta niining uhong kay duna diay P20 milyones nga mushroom growing project ang Division for the Welfare of the Urban Poor (DWUP) sa kagamhanan sa Siyudad sa Sugbo. Ang nakaparat kay way uhong nga niturok, matod pa ni Konsehal Nestor Archival Sr.
Si Archival, kinsa maoy nangulo sa pakisusi sa maong proyekto, niingon nga iyang gibisitahan ang giingong mushroom farms apan way bisan usa ka uhong siyang nakita. Usik sa kuwarta, matod pa niya. Ang maong programa gilusad sa DWUP sa hinapos nga bahin sa 2024.
Niabot sa 113 ka beneficiaries sa Barangay Binaliw ang gibansay-bansay niini isip panginabuhian. Gihatagan ang matag usa kanila og P4,000 nga seed capital aron makasugod na sa mushroom culture.
Si DWUP project evaluation officer Catherine Maderazo Trapzi niingon nga ang mushroom culture angay sa Cebu City kay wa kini magkinahanglan og dakong luna.
Ang usa ka metro kuwadrado mabutangan og 100 ka fruiting bags nga makaani og 30 gramos nga uhong kada duha ka mga semana sa presyo nga P100 kada 100 grams. Nindot kaayo nga livelihood project.
Kana lagi kon moturok ang uhong. Di na ra ba sama sa unang panahon nga manurok lang ang mga uhong ug libgos sa ilawom sa kalubihan, kasagingan ug kawayanan.
Matod pa ra ba ni Konsehal Archival, usa ka mushroom grower ug kandidato pagkamayor sa Siyudad sa Sugbo, di sayon ang pagpaturok og uhong.