Gisuspenso ni Gov. Gwendolyn Garcia ang pagbaligya sa tag P20 matag kilo sa bugas humay sa tibuok lalawigan sa Sugbo. Matod niya, iyang huwaton ang klarong lagda gikan sa Commission on Elections (Comelec). Sa election period man gud, daghang mga butang nga gidili sa Comelec.
Murag pareho man ni sa pagpahamtang sa gobernador og six months preventive suspension sa Office of the Ombudsman tungod sa iyang giingong paghatag og special permit sa desilting o pagkubkob sa Mananga River, usa ka protected area sa Talisay City, atol sa El Niño sa 2024.
Matod ni Gov. Garcia, di lang una siya manaog sa Kapitolyo kay ang pagsuspenso kaniya way pagtugot sa Comelec. Ambot kon ngano nga didto man siya mosuwat sa Department of the Interior and Local Government, di man sa Comelec.
Pormal nga gilusad ang maong programa sa Mayo 1.
Apan gipahunong lang una kini sa Mayo 3 subay sa pamahayag ni Comelec Chairman George Erwin Garcia nga ang tanang matang sa financial assistance o “ayuda” gidili atol sa election period gikan sa Mayo 2 hangtod sa Mayo 12.
Ang gitugotan kadto lang medical ug burial assistance.
Daghang mga tawo nga nalipay nga nakatilaw sa tag P20 nga kilo sa bugas.
Duna pay nihangyo nga ibaligya kini sa kamerkadohan. Apan lisod tingali kining mahitabo kay gi-subsidze man kini sa gobyerno lokal ug nasyonal, di na mahimong patungan pa aron makaginansiya ang retailers.
Sagdi lang kay matod pa ni Capitol consultant Atty. Rory Jon Sepulveda ang programa wa man wagtanga, gihunong lang agi og pagtahod sa lagda sa Comelec.
Andam ang lalawigan matod pa niya, nga ibalik ni human sa eleksyon sa Mayo 12.
* Sa ato nang giingon dinhi, gitaplan sa pundo sa gobyerno ang alkanse sa pagpamaligya og tag P20 nga matag kilo sa bugas humay.
Atong giklaro nga bugas humay kay ang mga Bisdak ra ba mokaon sab og bugas mais.
Ang baratong bugas nga gipamaligya gipalit og P33 ang kilo gikan sa National Food Authority.
Aron ikabaligya og P20 ang matag kilo, magtunga ang Department of Agriculture ug ang lokal nga kagamhanan – tag P6.50 silang duha.
Naa na gyud ang tag P20 nga kilo sa bugas.
Apan matod pa sa gobernador nga samtang gihatagan og exemption ang Sugbo gikan sa election ban alang sa “Sugbo Merkadong Barato” initiative, nagkinahanglan gihapon siya og klarong opinyon sa Comelec bahin sa rice subsidy program.