Nikabat sa tulo ka buwan una pa nahibalik ang kuryente sa dul-an sa tunga sa milyon ka mga kustomersa Visayan Electric dinhi sa Metro Cebu gikan sa pagkuso-kuso sa bagyong Odette niadtong Disyembre 16, 2021.
Daghang mga poste sa Veco ug sa telecommunications company (telcos) nga natumba ug nangabali. Dihay mga poste nga naputol apan wa matumba kay nagbitay sa baga ug naglambod nga “spaghetti wires” nga nagtapot niini sama niadtong duol sa Redemptorist Church.
Abi nako’g higayon na kadto nga mahawan na ang samok ug gubot kaayong tan-awon nga spaghetti wires. Apan nagpabilin kini hangtod karon. Ang Visayan Electric mihawan sa overhead wires gikan sa Kapitolyo paingon sa Fuente Osmeña. Pero ang minilyon nga gasto gibahin-bahin ra sab sa mga customer niini.
○ ○ ○
Kon ang Sugbo gustong mahimong Singapore-like, kinahanglan nga mangusog ang kagamhanan sa siyudad sa paghawan sa maong spaghetti wires. Nganong maglisod man sila sa paghawan niini? Asa na man ang ilang giingon nga political will?
Si Cebu City Councilor Jerry Guardo, ang tsirman sa technical infrastructure committee sa konseho nga nahinabi sa “Beyond the Headlines,” nga ang online news and commentary program sa SunStar Cebu, niingon nga mokabat sa 60 porsyento sa overhead wires mga “dead wire” ug 40 porsyento na lang ang functional.
Kadaghanan niini telco wires nga natigum sa miaging 20 ka tuig tungod sa kakuwang sa maintenance ug regular clearing operations. Taud lang kay taud, mao na nga matod niya, nibaga na kaayo ug hugaw na kaayong tan-awon.
○ ○ ○
Dunay programa si Cebu City Mayor Michael Rama nga gitawag og “Oplan Ratsada” ug gitumong sa paghawan sa spaghetti wires nga delikado alang sa mga tawo kay duna nay mga kaso sa mga tawong nag-motor nga nabitik ang liog sa nagbitay nga mga alambre.
Asa na man karon ang Oplan Ratsada? Way ikatubag si Konsehal Guardo niini. Apan maayo tingali nga molihok sab ang telco operators dinhi sa siyudad sama sa Converge, PLDT, Globe Telecom, Smart Communications, SkyCable ug Dito isip ilang tampo sa paghimo sa siyudad nga Singapore-like. Laing maayong plano ni Guardo mao kining single pole policy sa mga telco. Sa kadaghan sa ilang mga poste, nababagan na hinuon ang mga aseras.