Usa ka lalaki nga mahuyang gisigihan og bugal-bugal nga bayot. Niadto siya sa usa ka tattoo artist aron magpa-tattoo aron di na bugal-bugalan.
Matod niya, “Magpa-tattoo ko, Bay, aron ingnon nga isog ko.” Tattoo artist: “Asa man nato ibutang ang tattoo?” Mahuyang: “Sa kilay lang aron ingnon nga maldita.”
Kasagaran kaniadto sa mga tawo nga daghan og patik sa lawas mao kadtong mga ex-convict ug kadtong nakagawas sa prisohan.
Kadtong daghan og patik giila nga mga maldito sa ilang dapit. Apan pag-abot sa pulis, ang patik nga agila sa ex-convict nga naghagis nahimong tamsi, ang kobra nahimong wati.
Nipagawas ang kadagkoan sa Philippine National Police (PNP) sa Memorandum Circular 2024-023 nga nagmando sa mga pulis nga ipatangtang ang ilang mga patik nga di matabunan sa ilang uniporme. Gitumong kini sa pagmintinar sa ilang professional image.
○ ○ ○
Si Police Lt. Col. Gerard Ace Pelare, tigpamaba sa Police Regional Office (PRO) 7, niingon nga ang maong memorandum niadtong Marso 19, 2024. Ipatangtang ang mga patik nga di matabunan sa uniporme. Ang tattoo nga matago sa uniporme, mahimong ipabilin.
Bisan di na ipatangtang ang tattoo nga matago, gikinahanglan nga ang mga pulis nga may patik moluwat sa usa ka affidavit nga maglista sa gidaghanon ug asa dapit ang ilang mga patik. Kinahanglan nga di na kini madugangan, matod pa ni Col. Pelare.
Si Pelare mibutyag nga gidili nang daan sa PNP ang mga tattoo niadtong mga tawo nga gustong mosud sa pagkapulis. Apan ang bag-ong lagda alang sa mga aktibong sakop sa kapulisan nga nagpapatik human sila nahimong sakop sa kapulisan.
○ ○ ○
Busa kadtong gustong magpulis, ayaw mo’g papatik aron ingnon nga bagsik. Kay mao na kini ang lagda sa PNP, matod pa ni Pelare, usa ka abogado.
Gitahod sa PNP, matod niya, ang “freedom of expression.” Apan ang mga lagda sa PNP kinahanglan tumanon sa mga sakop niini.
Gitugotan ang visible tattoo sa ubang kapulisan sa Estados Unidos, sa London ug uban pa. Ang patik nga unang nauso sa mga kriminal, ilabi na sa mga sakop sa mga sindikato sama sa Yakuza, karon nahimo na nga usa ka body art.