Barrita: Pagtukod og mga pantalan

Mahinungdanon ang mga pantalan alang sa transportasyon sa mga tawo ingon man kargamento, ilabi na sa Pilipinas nga usa ka archipelago, nasod nga gibuwag-buwag sa kapin sa pito ka libo ka mga isla.

Ang siyudad sa Sugbo maoy shipping hub sa Kabisay-an kay anhi manukad ang mga biyahe padung sa ubang bahin sa Kabisay-an ug Mindanao. Apan duna say mga pantalan sa ubang mga siyudad sama sa Mandaue, Danao, Bogo ug Toledo ug sa ubang kalungsoran.

Ang lungsod sa Liloan, nga hapit na mahimong siyudad, bag-o lang nga nakatukod og pantalan nga gitumong sa pagpadali sa pagbiyahe gikan sa Liloan ngadto sa mga siyudad sa Sugbo ug Lapu-Lapu kay ang kahuot sa trapiko sa lungsod sa Consolacion nisuyla ug miabot na ngadto sa Liloan.

* * *

Ang mga isla sa Camotes ug Bantayan dunay mga pantalan alang sa roll-on-roll-off (roro) nga mga barko. Busa, tungod sa RORO port sa lungsod sa Sante Fe sa isla sa Bantayan, moabot na sa maong isla ang biyahe sa Ceres ug makadala na og mga sakyanan ang mga turista.

Ang isla sa Bantayan, nga gilangkuban sa mga lungsod sa Santa Fe, Madridejos ug Bantayan, mao ang gitawag nga “egg basket” sa Central Visayas. Sa 2023, ang SunStar Cebu mitaho nga ang egg production sa maong isla miabot og 1.9 ka milyon ngadto sa duha ka mil­yon ka itlog kada adlaw.

Mao na nga si Mayor Romeo Villaceran sa Madridejos na­ningkamot nga makatukod og pantalan sa ilang lungsod. Matod niya, ang Madridejos nagbaligya og kapin sa P10 mil­yones nga balor sa mga itlog matag buwan sa mga siyudad sa Iloilo ug Bacolod sa Wes­tern Visayas bisan pa kon way direkta’ng biyahe sa barko tali sa iyang lungsod ug sa maong mga siyudad.

* * *

Kon duna nay pantalan sa Madridejos, ang ilang income sa pag-supply og itlog sa Western Visayas, gipaabot nga mosaka ngadto sa P40 milyo­nes matag buwan, matod pa ni Mayor Villaceran.

Sa pagkakaron, sanglit wa man silay pantalan, ibiyahe pa ang ilang itlog og 40 minutos gikan sa Madridejios paingon sa Santa Fe. Laing usa ka oras nga biyahe sa barko gikan sa Santa Fe paingon sa Hagnaya Port sa lungsod sa San Remigio sa Cebu mainland.