Usa ka tiguwang lalaki nikuha og usa ka babaye nga nagbaligya og unod. Human sa first round, miingon ang babaye: “Bilib ko nimo, Noy, dah. Kon kaya pa nimo, librehon ta ka sa ikaduha.” Tiguwang: “O sigi, pahuway usa ko kadiyot. Motagpilaw ko. Pero kupti ang akoa.”
Pagmata sa tiguwang, second round dayon. Babaye: “Grabe ka, Noy. Mao ra diay ni imong sekreto. Pakuptan ra nimo ang imoha.” Tiguwang: “Ing-ani man gud ni Miss. Sa una, di nako pakuptan ang akoa. Apan pagmata nako, nawagtang man ang akong pitaka.”
Sa Cebu City Hall, dunay laing transaksiyon nga naglambigit sa mga edaran nga lalaki ug mas batan-ong mga babaye, labi na sa mga job order (JO) employees aron makakuha og sexual favors. Gitawag nga mga “Palawan Boys” tungod kay mao may gigamit sa pagpadala og kuwarta.
○ ○ ○
Si Atty. Homer Cabaral, ang resident ombudsman sa Cebu City Hall, miingon nga wa pay pormal nga reklamo nga miabot sa iyang buhatan mahitungod sa “Palawan Boys” nga migawas sa usa ka post sa usa ka kontrobersiyal nga Facebook page.
Giawhag niya ang si bisan kinsang dunay kasayoran sa “Palawan Boys” sa pagpadangat niini sa iyang buhatan, sa pagluwat og pinanumpaang pamahayag aron maimbestigahan kini. Sa pagkakaron, ang Facebook post matawag lang nga “hearsay.”
Samtang si Acting Mayor Raymond Alvin Garcia miingon nga lisod imbestigahon ang mga alegasyon bahin sa “Palawan Boys” kay way mga ngan nga nilutaw. Ang JO employees nga nalambigit di manug-an. Labaw pang di moangkon ang mga Palawan Boys.
○ ○ ○
Daghan ang mga sekretong paagi sa money remittance. Di lang kay sa Palawan. Naa pay sa M. Lhuillier ug uban pa. Apan kon lain nga money remittance ang gamiton, di na sila matawag og Palawan Boys. Naa pay mas sekreto, ang Gcash, kay diretso sa cellphone.
Ang Cebu City Human Resource and Development Office (HRDO) magpahigayon og dugang seminars sa pagpahibawo sa mga kawani sa ilang mga katungod. Si Henry Tomalabcad, pangulo sa HRDO, miingon nga seryuso kini kay basin daghan ang nabiktima apan nagpakahilom kay nahadlok nga matangtang sa trabaho.
Lain kining ehemplo nga ang mga isyu sa social media mahimong makapaukay sa Cebu City Hall. Karon pa ni o dugay na? Dugay na man nang Palawan. Basin dugay sab mogawas ang suweldo sa mga JO maong matintal sa Palawan Boys tungod sa panginahanglan?