Barrita: Pedestrianization o sirad-an na lang sa mga sakyanan?

Tikdul-Tikdol
SunStar Barrita
SunStar Barrita

Didto sa Estados Unidos, nang­reklamo ang mga magpapatigayon sa pagbiya sa mga tawo sa ilang downtown area kay gihigop sa mga dagkong mall nga dunay mga dagkong parking area. Nimingaw ang ilang downtown area.

Lakip sa ilang plano alang sa urban renewal mao ang pagsira sa pipila ka kadalanan sa downtown area aron himuon nga usa ka shopping district nga susama sa malls.

Sa maong mga dapit, ang mga pedestrian maoy hari sa karsada. Usa na niini ang Third Street Promenade sa Santa Monica, California. Gihugopan kini sa mga tawo kay naa man ang mga dagko ug sikat nga mga tindahan ug mga restaurant nga i­mong makita sa malls. Apan naa gihapon ang mga gagmay nga tindahan.

○ ○ ○

Nagplano ang kagamhanan sa siyudad sa Sugbo nga maghimo og pedestrian walkways sa historic area sa downtown area sama sa dalan Colon, ang labing karaan nga dalan sa tibuok Pilipinas. Ila kining gitawag nga pedestrianization. Hilaw kon itandi sa nahitabo sa Third Street Promenade sa Santa Monica, California.

Sa Third Street Promenade, tulo ka blocks ang gihimong “car-free, open-air shopping haven and farmers market.” Sa downtown area, padak-an lang ang agianan sa mga pedestrian. Mohuot og samot ang mga karsada. Sa Santa Monica, di na gyud paagian og mga sakyanan.

Mao kini ang angayan nga tun-an pag-ayo sa atong city planners. Kay morag magdugang sa kahuot sa trapiko ang pedestrianization kay makuhaan man ang kaagian sa mga sakyanan. Kon sirad-an sa mga sakyanan, wala na gyuy trapik.

○ ○ ○

Kinahanglan sab nga buta­ngan og mga terminal sa mo­dern public utility jeepneys ug buses ang duol sa lugar kansang mga karsada sirad-an sa mga sakyanan aron dunay masakyan ang mga tawo nga moadto sa maong mga dapit.

Mahimo sab nga ipahamtang ang hybrid system. Sa ato pa. ipabilin nga bukas ang ubang mga karasada sama sa Colon ug uban pa samtang sirad-an ang mga gaymay nga karsada.

Sama sa tanang kausaban nga ipahamtang, dunay misupak sa pedestrianization plan sa kagamhanan sa siyudad.

Ang labing maayo mao nga konsultahon ang mga apektado nga mga magpapatigayon. Mas nindot pa gyud kon makuha ang ilang kooperasyon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph