Barrita: Pogo, pwede nga himuong Trojan Horse?

Sa Greek mythology, nag­lisod ang mga Greek sa pagguba sa habog nga paril ug pagsulod sa lig-on nga ganghaan sa siyudad sa Troy sulod sa napulo ka tuig nga gubat. Nagbuhat sila og higanteng kabayo nga hinimo sa kahoy. Didto sa sulod niini ang pinili nga mga sundawo.

Nagkapatuo ang mga Greek nga namiya sila sa Troy. Nagtuo ang taga Troy nga ang higanteng kabayo usa ka gasa busa ilang giguyod sulod sa siyu­dad. Pagkagabii, nanggawas ang mga sundawong Greek ug giablihan ang ganghaan aron makasulod ang ilang mga kauban. Gidauban sa mga Greek ang Troy. Human ang gubat.

Ang maong kabayo nga hinungdan sa pagkapildi sa siyudad sa Troy gitawag nga Trojan horse. Karon gigamit kini nga termino sa mga virus ug malicious program nga gigamit sa pagguba sa software sa mga computer.

○ ○ ○

Way lig-on nga koral nga sama sa siyudad sa Troy ang Pilipinas nga gilangkuban sa kapin sa 7,000 ka mga isla. Sayon ra kaayong dunggoan sa mga langyaw. Apan mitumaw karon ang kabalaka nga ang mga Philippine Offshore Ga­ming Operations (Pogo) himuong Trojan horse sa China.

Gani, si Senador Risa Hontiveros niadtong Miyerkoles, Hunyo 5, 2024, miawhag sa administrasyon ni Presidente Ferdinand “Bongbong” Marcos Jr. nga ideklarar ang mga Pogo nga usa ka hulga sa nasudnong seguridad tungod sa kalambigitan niini sa daghang mga illegal nga kalihukan sama sa cybercrimes, human trafficking ug money laundering.

Usa sa gikabalak-an mao ang paggamit sa mga Pogo sa pagsulod sa Pilipinas sa nagkalain-laing mga langyaw, ilabi na sa Chinese nationals. Nahibaw-an kini pinaagi sa pagronda sa nagkalain-laing Pogo operations sa Luzon ug dinhi sa Sugbo.

○ ○ ○

Gikabalak-an usab ang impluwensiya sa mga Pogo sa managlahing sektor sa katiling­ban, ingon man sa local nga kagamhanan. Nitumaw kini sa pagronda sa usa ka Pogo ope­ration sa Bamban, Tarlac ug sa imbestigasyon sa Senado sa mayor niini, si Alicia Guo, nga naglisod paghatag og detalye sa iyang pagkatawo.

Bisan ang Korte Suprema mipagawas og pamahayag nga ilang imbestigahon kon ang impluwensiya sa mga Pogo ug sa ilang mga protector niabot na ba sa hudikatura. Nunot kini sa gibutyag ni Senador Sherwin Gatchalian nga nanglayas na ang Pogo agents sa Pampanga samtang giandam pa ang search warrant sa korte.

Ang Pogo sa Pampanga dunay mokabat sa usa ka libo ka mga trabahante apan ang naabtan sa nagronda nga mga tinugyanan sa balaod kapin ra sa 140.