Barrita: ‘Portalets’, ‘portabaths’ sa Palaro

SunStar Barrita
SunStar Barrita

Sa usa ka siyudad nga sa Singapore buot makig-indig (Singapore-like), dag­han pang angay nga atimanon ang siyudad sa Sugbo.

Usa na niini ang kakuwang sa public toilets. Mao nga daghan gihapong makit-an nga mangihi sa daplin sa karsada o sa kilid sa paril. Imbis “against the law,” “against the wall” na.

Luoy intawon kaayo kadtong gibus-aw, kadtong dunay suliran sa prostate ug may balatian nga diabetes. Mag-apas sa sugo sa lawas. Kon mangihi sa daplin sa karsada unya masakpan sa sakop sa Cebu City Environmental Sanitation and Enforcement Team (CCESET), multa.

Bentaha na lang og dyutay kay ang mga mall duna nay comfort rooms. Kaniadto, ang mga tindahan sa Colon sa downtown area, mangita pag resibo aron maka­gamit ka sa ilang kasilyas.

○ ○ ○

Karon, gikagubtan ang pag-abang sa kagamhanan sa siyudad sa Sugbo og portalets ug portabaths isip principal host sa Palarong Pambansa 2024 sa umaabot Hulyo 6 ngadto sa 17. Mokabat sa 12,000 ka athletes ug coaches ang moapil niini.

Sa maong gidaghanon, di na malalis ang panginahanglan sa portalets ug mga porta­baths. Kuwang ang mga kasil­yas sa mga eskuylahan nga papuy-an sa mga delegasyon. Labaw pang way kaligoanan ang maong mga tunghaan.

Ang kuwestiyon mao nga hain ang mas maayo, moabang o mopalit na lang sa maong portalets ug portabaths. Gikuwestiyon sab ang kamahal sa abang. Dunay misugyot nga ang gamiton na lang unta ang salapi para abang sa paghimo og mga kasilyas sa mga eskuyhanan kay magamit pa kini sa mga tinun-an.

○ ○ ○

Tiaw mo bay P18 milyunes ang gigahin sa siyudad alang sa pag-abang sa portalets ug porta­baths? Alang kini sa 248 ka portalets ug 230 ka portabaths. Ang orihinal nga kantidad P21.9 mil­yones apan gikorehian ngadto sa P18 milyunes.

Tungod sa negatibong mga reaksyon sa media, migawas ang taho nga gikanselar ang pag-abang sa maong portalets ug portabaths. Apan lagi kay kinahanglan man kini sa Palaro, takwahaw lang nga migawas nga ipadayon ang pag-abang niini.

Apan ning higayona nikunhod na. Ang abangan mao ang 118 ka portalets nga dunay gahin nga P5,215,600 ug 230 ka portable shower rooms nga may gahin nga P8,445,600. Ang tanan moabot gihapon og kapin sa P13.6 milyones. Kamo na lay kuwenta tagpila ang abang sa usa.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph