Barrita: PUVs di na kaagi sa Osmeña Blvd.?

SunStar Barrita
SunStar Barrita

Gitubag na sa mga nag­plano sa Cebu Bus Rapid Transist (CBRT) system kon makasulbad ba kini sa kahuot sa trapiko. Ang ilang tubag – dili. Unsaon pagsulbad sa kahuot sa trapiko nga kuhaan na man hinuon og duha ka lanes ang kadalanan ug ang mga bus sa CBRT mao ray makaagi?

Tumong sa CBRT ang usa ka efficient mass transportation system nga gikinahanglan sa usa ka modernong siyudad sama sa Cebu City. Sumala sa mga taho, adunay 74 ka airconditioned bus ang CBRT. Makaingon kita nga efficient kay dunay bus nga molarga matag 10 minutos.

Apan lagi adto ka mag-atang sa estasyonan sa CBRT. Di na mahitabo ang atong gusto nga adto gyud manaog sa tungod sa atong destinasyon, morag “door-to-door” ba. Di man hinuon kaayo lagyo ang mga estasyonan sa CBRT.

○ ○ ○

Ingon sa moluag og dyutay ang mga rota nga agian sa CBRT, sama sa Osmena Boulevard kay di na man unya kini paagian sa public utility vehicles (PUVs), sumala pa ni Cebu City Acting Mayor Raymond Alvin Garcia. Mga pribadong sakyanan ra ang tugotan nga moagi sa maong mga dapit.

Subay kini sa usa ka rerou­ting plan ubos sa Local Public Transport Route Plan (LPTRP) nga gisumitir na apan aprobahan pa sa Department of Transportation (DOTr). Mausab na ang mga rota sa mga PUVs.

Si retired Col. Eduardo Montealto Jr., direktor sa Land Transportation Franchising and Regulatory Board (LTFRB) 7, miingon nga gi-integrate sa LPTRP ang CBRT. Kon maaprobahan na ang rerouting plan, moluwat sila og bag-ong mga rota ug mga prangkisa sa PUVs.

○ ○ ○

Samtang si Garcia miingon nga ang CBRT modiretso sa Cebu port area pinaagi sa 1.15 ka kilometro nga port link gikan sa P. del Rosario ngadto sa Plaza Independencia. Ilang giplanohan nga sa downtown area, tugotan ang mga tarta­nilla nga sa didto pa ko sa DYRC, among gitawag nga “one-horse-powered vehicle.”

Lakip kini sa pedestrianization project sa downtown area nga gideklarar sa Cebu City Council nga usa ka heritage district pinaagi sa usa ka ordinansa. Sa maong proyekto, ang pedestrians maoy bida, maoy palabihon kay sa mga sakyanan.

Sa pedestrianization, madasig ang mga tawo sa pagla­kaw, matod ni Garcia.

Kon kapuyon, sakay og tartanilla.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph