Dunay kanta nga nag-ingon, “Kung ako ang papilion, sa kasal o taban-taban. Gusto ko gyud ang taban-taban kay wala’y gasto sa ginikanan. Sa kasal may luhod-luhod, sa taban-taban may pagukod-gukod.”
Dako pa gyud kaayo og gasto ang magpakasal, labi na kon en grande ang kasal nga dunay wedding planner ug taas kaayo nga seremonyas.
Daghan pa gyud ang nangabiktima sa mga wedding scam, sa wedding planners nga nikalit lang og kahanaw.
Mao tingali kini ang nabantayan sa civil registration sa Philippine Statistics Authority (PSA), nga gikutlo sa taho sa Commission on Population and Development (CPD), nga nikunhod ang gidaghanon sa mga Pilipino nga nagpakasal. Nagpuyo-puyo na lang.
○ ○ ○
Sa tuig 2022, pagkahuman sa Covid-19 pandemic, nisaka og 25.9 porsyento ang gidaghanon sa mga Pilipino nga nagpakasal ngadto sa 449,428 ka magtiayon gikan sa 356,839 sa 2021. Apan wa kini magdugay.
Sa pagkasunod tuig, 2023, nikunhod ang gidaghanon sa nagpakasal og 7.8 porsyento ngadto sa 414,213.
Sa 2024, ang provisional data nagpakita nga nikunhod pa gyud og 22.6 porsyento ngadto na lang sa 320,524 ka magtiayon nga nagpakasal kon ikomparar sa niaging tuig.
Apan way datus nga gipagawas ang maong taho sa gidaghanon sa mga nagpuyo-puyo lang o kon way pormal nga kasal sa simbahan o sibil.
Ang civil wedding mahimong adto sa mayor sa mga lungsod ug syudad o sa mga huwes.
○ ○ ○
Makita hinuon nato nga daghan na sab ang nagpakasal sa sibil, tingali sa paglikay sa mas dako nga gasto sa kasal sa simbahan. Bisan pa niini, nikunhod ang civil ceremonies gikan sa 43.3 porsyento sa 2022 ngadto sa 42.9 porsyento o 177,627 ka mga kasal sa 2023.
Ang kinadaghanan sa mga kasal sa simbahan mao ang sa Katoliko Romano nga 31.4 porsyento (130,170 ka mga kasal). Samtang 23.5 porsyento ang ubang religious rites (97,538 ka mga kasal). Ang Muslim ug tribal ceremonies anaa sa 2.2 porsyento.
Mas daghan ang nagpakasal sa buwan sa Pebrero, sunod ang buwan sa Disyembre ug ikatulo lang ang buwan sa Hunyo. Busa kon natawo ka sa buwan sa Nobyembre, nakahibawo ka kon unsang buwana ka gihimo. Apan ang uso karon, magpakasal kon hapit na manganak.