Sa boto nga 18-5 niadtong Martes sa gabii, gipadala og balik sa mga senator-judge ang articles of impeachment batok ni Bise Presidente Sara Duterte ngadto sa House of Representatives.
Ingon pa ni Senador Sherwin Gatchalian, kinsa supak sa maong lakang, sama kini sa “Return to sender.”
Naunsa na ni, ang Senado nahimo nang post office? Si Senador Gatchalian niingon nga ang return to sender mahitabo lang sa post office.
Wa siya magdahom nga mahitabo sab ni sa Senado. Ang pag-remand sa articles of impeachment usa ka “uncharted territory,” matod niya.
Nagsugod ni sa mosyon ni Senador Ronald “Bato” dela Rosa nga ipa-dismiss ang impeachment batok ni Duterte.
Asa ka mangita’g huwes nga maoy mopa-dismiss sa kaso? Giamendahan kini ni Senador Alan Peter Cayetano nga mbes i-dismiss, ibalik ang articles of impeachment ngadto sa House. Return to sender.
Usa sa ilang tuyo mao ang sertipikasyon sa House nga wa malapas ang Art. XI, Section 3, paragraph 5, 1987 Constitution, nga nag-ingon, “No impeachment proceedings shall be initiated against the same official more than once within a period of one year.”
Apan makamando ba ang Senado sa House nga co-equal bodies man sila?
Si Senate President Francis Escudero niingon nga angay nga respetohan ang ilang mando kay desisyon kini sa impeachment court ug prosecutor lang ang House.
Nakalimot tingali ni sila sa giingon ni anhing Senador Joker Arroyo sa dihang kongresista pa siya sa Makati ug lead prosecutor sa impeachment trial ni kanhi presidente Joseph Estrada.
Matod niya, “The House is supreme in its sphere.”
Apan wa dayon dawata sa House ang giuli nga articles of impeachment. Gipasa pero wa saw-a. Asa na man kini paingon karon? Ibalik na sab sa Senado? Basin sa ngadto-ngadto way impeachment trial nga mahitabo. Anugon lang ang ilang toga. Ang gikabalak-an ni Atty. Christian Monsod, usa sa mga nagpanday sa 1987 Constitution, nga dunay mga senador nga nahilakip sa makapaalarma nga statistic nga 73 porsiyento sa mga Pilipino gamay ra o wa gyu’y nahibaw-an sa Konstitusyon.
Ang trabaho sa impeachment court mao ang pagbista, matod ni Monsod.
Ang mga constitutional issues angay nga itugyan ngadto sa Korte Suprema. Apan sa laktod, ang impeachment usa ka political exercise. Sa gidaghanon sa boto ra gyud dauga.