Barrita: Sayop bang mangopya?

Tikdul-Tikdol
Barrita Tikdul-Tikdol
Barrita Tikdul-Tikdol

Dunay nisu’d nga batan-ong mongha sa usa ka monasteryo. Iyang nakita nga ang mga karaang mongha nagkopya sa Bibliya nga kinopya ra sab.

Kon dunay sayop, makopya ra sab. Busa iyang gibasa ang orihinal. Nadiskubrehan niya nga imbis “celibate” ang orihinal kay “celebrate” man diay. Sa pagkahibawo sa mga mongha, nanghilak silang tanan.

Sa eskuylahan, ang mga magtutudlo moingon sa mga estudyante nga sayop ang mangopya sa tubag sa laing estudyante sa panahon sa exam.

Kay duna may mga estudyante nga maayo sa ”math,” maayo diay og mata nga motan-aw sa tubag sa iyang classmate.Labi pa gyud kon ang gikopya sayop sab.

Apan dunay miingon nga di sayop ang mangopya kon ang buot ipasabot mao ang pagsundog sa nindot ug maayo sama sa uso nga sinina ug maayong pamatasan.

Gani, ang mga maayong kusinero nagsundog man sa mga maayong kusinero ingon man ang mga maayong barbero, sastre, pintor, iskultor ug uban pa.

○ ○ ○

Naghisgot kita niini tungod sa damgo ug pangandoy ni Cebu City Mayor Mike Rama nga mahimo’ng Singapore-like ang syudad sa Sugbo. Di gyud mahimong Singapore, susama lang sa Singapore.

Wa mag-inusara si Mayor Rama niini. Si Lee Kuan Yew, kanhi primero ministro sa Singapore, sa dihang gi-interview sa mga propesor sa Harvard Kennedy School nga sila si David Gergen, Ron Heifetz, Dean Williams ug John Thomas, mibutyag nga ang China nangopya sab sa Singapore.

Si Deng Xiaoping, kanhi pangulo sa China, mimando nga kopyahon ang sukod sa tibuok Singapore, gikan sa mga karsada ug tanang infrastructure, plaza, mga park ug mga building. Apan way nahitabo kay matod pa ni Lee Kuan Yew ang mahinungdanon mao ang mga tawo.

○ ○ ○

Ang makapahimuot kay nitimang si Cebu Governor Gwendolyn Garcia sa pag-ingon, “Ang Sugbo way sama. Dili mangopya. Way sundugan. Kay Sugbo ang sumbanan. Sugbo, atong garbo.” Wa siya maghisgot sa pagkopya sa Singapore.

Unsa man diay karon ang kahimtang sa siyudad sa Sugbo? Sa mga mata ni Yogi Filemon Ruiz, kanhi Philippine Drug Enforcement Agency (PDEA) regional director sa Central Visayas, nikunhod ug naut-ot ang siyudad sa Sugbo. Mao kini nga modagan siya pagkamayor sa siyudad sa 2025.

Matod ni Ruiz, iyang sulbaron ang mga suliran sa peace and order, health and social services, kahuot sa trapik, pagkolekta ug paglabay sa basura, pagbaha ug drainage nga matod pa niya “neglected” o wa matagad sa kagamhanan sa syudad. Kon makadaug siya.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph