Ang Korte Suprema mipakanaog sa lagda nga ang usa ka security guard di makonbikto sa kasong illegal possession of a firearm kon makatarunganon ang iyang pagtuo nga lisensiyado ang pusil nga giisyu kaniya sa iyang security agency.
Mao kini ang desisyon sa Hilario Cosme v. People of the Philippines (G.R. No. 261113, Aug. 14, 2024) nga sinuwat ni Associate Justice Ricardo R. Rosario sa Supreme Court First Division nga nag-absuwelto sa usa ka security guard sa kasong ilegal nga paghupot og pusil ubos sa Republic Act No. (RA) 10591, ang Comprehensive Firearms and Ammunition Regulation Act.
Sa tungang gabii niadtong Hulyo 7, 2017, ang security guard nag-duty sa usa ka gasoline station sa dihang usa ka polis nga nagpatrolya nakakita kaniya nga nagdala og pusil nga giisyu sa iyang security agency.
Wa siya magsul-ob sa iyang prescribed uniform. Sa dihang gipangitaan siya sa lisensiya sa pusil, wa siya’y gipakita, busa gidakop siya sa polis.
Nakakuha ang kapulisan og sertipikasyon nga ang security guard dili usa ka licensed firearm holder.
Sa iyang depensa, ang security guard niingon nga usa siya ka licensed security guard subay sa iyang License to Exercise Security Profession nga giisyu sa Philippine National Police Civil Security Group Office.
Duna sab siya’y Duty Detail Order (DDO) nga nagpakita nga nadestino siya sa gasoline station ug nagtugot kaniya sa pagdala sa pusil nga giisyu sa security agency.
Nagtuo siya nga lisensiyado ang pusil nga giisyu ngadto kaniya.
Nangatarungan usab siya nga wa siya makasul-ob sa iyang uniporme kay nakalimtan niya ang yawe sa iyang locker.
Gikonbikto siya sa Regional Trial Court sa kasong illegal possession of firearms and ammunition.
Gidasonan kini sa Court of Appeals kansang desisyon nag-ingon nga igo na ang pagprobar nga way lisensiya ang security guard sa paghupot og pusil aron makonbikto siya ug ang DDO dili usa ka balido nga depensa.
Gibali ang maong desisyon sa Korte Suprema kay ubos sa 1983 implementing rules sa maong balaod, ang mga private security agency guards makadala og pusil sa ilang gidestinohan kon gitugotan kini sa usa ka DDO.
Ang 2018 revised rules sa maong balaod nagkonpirmar nga ang DDO maoy nagtugot sa usa ka security personnel sa pagdala sa pusil nga giisyu kaniya sa lugar ug oras nga nag-duty siya.
Ang Korte Suprema namahayag nga ang usa ka guwardiya mahimong mosalig sa gilatid sa DDO nga lisensiyado ang pusil nga giisyu kaniya.
Di na siya kinahanglan pa nga mangita pa og pruweba nga lisensiyado ang maong pusil.
“Where the accused security professional is licensed to exercise their profession and is equipped with a permit sanctioned by law [such as a DDO], possession of the issued firearm under a belief in good faith that it is licensed is a valid defense in a case for illegal possession of firearm,” nagkanayon ang Korte Suprema.
Sanglit way pruweba nga nasayod ang security guard nga di lisensiyado ang pusil nga giisyu ngadto kaniya, ang DDO maoy nagtugot kaniya sa pagdala sa maong pusil, busa giabsuwelto siya. – edbarrita@gmail.com