Giabsuwelto sa Korte Suprema ang usa ka security guard nga giakusahan sa kasong kalapasan sa election gun ban tungod sa usa ka depekto sa Information, ang pormal nga dokumento sa kiha batok kaniya.
Sa kaso nga Efren Sadiarin Baguinon Sr. v. People of the Philippines (G.R. No. 255983, Jan. 27, 2025) nga sinuwat ni Associate Justice Samuel H. Gaerlan, gibali sa Supreme Court Third Division ang pagkonbikto ni Efren Sadiarin Baguinon Sr. sa Regional Trial Court (RTC) ug sa Court of Appeals (CA) tungod sa pagdala og pusil atol sa election period nga way tukmang permiso.
Si Baguinon, usa ka security guard sa AFM Protective Agency, nagmaneho sa iyang motorsiklo padulong nga mopauli sa dihang nabangga sa tricycle nga gimaneho ni Nestor Badiong.
Atol sa panaglalis sa duha, nilanit si Baguinon sa iyang service firearm, mition niini kang Badiong, ug mipabuto sa makaupat ka higayon.
Apan way bisan usa nga nakaigo kang Badiong.
Giabsuwelto sa Municipal Circuit Trial Court si Baguinon sa kasong attempted homicide.
Apan gikonbikto siya sa RTC ug sa CA kay napalgang sad-an sa kalapasan sa election gun ban ubos sa Section 32 sa Republic Act No. (RA) 7166, subay sa Commission on Elections Resolution No. 6446.
Apan ang Korte Suprema mihukom nga dili makabarog ang pagkonbikto ni Baguinon tungod kay ang Information napakyas sa pag-asoy sa tanang elemento sa krimen, nga gikinahanglan sa mga kasong kriminal.
Matod niini, ang katungod nga pahibaw-on sa kaso batok kaniya usa ka batakan nga kabahin sa due process, aron ang akusado makaandam sa iyang depensa.
Miingon ang Korte Suprema nga dunay duha ka managlahi nga election-related firearm offenses.
Ang una nagdili sa pagdala og pusil sa publikong lugar atol sa election period, subay sa Section 32 sa RA 7166.
Ang ikaduha nagsilot sa mga sakop sa security or police organizations sa way permiso nga pagdala sa pusil gawas sa ilang opisyal nga gitrabahoan atol sa campaign period, sa adlaw sa di pa ang eleksyon, sa adlaw sa eleksyon ug sa 30 ka adlaw human sa eleksyon, subay sa Section 261(s) sa Omnibus Election Code (OEC).
Niining duha ka kaso, ang prosecution kinahananglan nga moklaro sa lugar nga nahitabuan sa krimen kay usa kini ka mahinungdanong elemento nga ilakip gyud sa Information.
Ang Information batok ni Baguinon igo lang miingon nga usa siya ka security guard nga nagdala og pusil gawas sa iyang gitrabahuan apan napakyas sa pag-asoy nga gihimo kini sa usa ka publikong lugar, usa ka importanteng elemento ubos sa Section 32 sa RA 7166.
Ang gisulti mao ra ang barangay ug lungsod apan wala mag-ingon nga sa publikong lugar.
Napalgan sa Korte Suprema nga nasayop ang prosecution sa pagkombinar sa mga elemento sa duha ka krimen pinaagi sa pagsagol sa tipik sa Section 261(s) sa OEC ug sa Section 32 sa RA 7166.
Kini nagkanayon, “Viewing the allegations therein together with the elements of Section 32 of [RA] 7166 and Section 261(s) of the OEC, it becomes clear that the prosecution effectively cherry-picked elements from these two separate offenses and pleaded them together in the Information against Baguinon. The prosecution then completely ignored this mistake and established a violation of the former offense during trial.”
Sanglit ang Information napakyas sa paglakip sa essential element nga ang krimen gihimo sa usa ka publikong lugar, wa pahibaw-a sa hingpit si Baguinon sa akusayon batok kaniya, busa giabsuwelto siya. (edbarrita@gmail.com)