Barrita: Sinulog 2024 sa SRP gihapon?

Barrita Tikdul-Tikdol
Barrita Tikdul-Tikdol

Pilay ligid sa panahon, 2024 na. Ug kon Enero na gani, Sinulog na’y naa’s atong huna-huna. Ang mga kalingawan nunot sa kapistahan ni Señor Sto. Niño ug ang Sinulog grand parade, ang labing dakong cultural event sa tibuok nasod nga gihugopan sa mabagang duot sa katawhan, langyaw ug lokal.

Ang Sinulog 2023 didto gipahigayon sa South Road Properties (SRP) bisan pa kon sa paghina­ngat niini, nagbunikot ang kalangitan ug siging uwan. Si Cebu Gov. Gwen Garcia nisugyot nga adto ipahigayon ang Sinulog sa Cebu City Sports Center (CCSC) kay way kapasilungan, way mga kasilyas ug lapukon ang SRP. Di pa kini andam.

Apan si Cebu City Mayor Mike Rama niinsistir nga adto ipahigayon ang Sinulog sa SRP. Ang hulga sa uwan ug sa madag-umon nga kalangitan, iampo na lang ni Señor Sto. Niño, matod niya. Tuod man, nihayag ang kalangitan, migawas ang haring adlaw nga nagpahipi sa mga panganod ug nadayon ang Sinulog sa SRP.

○ ○ ○

Gawas nga di pa andam ang SRP niadtong panahuna, nabalaka ang gobernador nga mag­huot ang trapiko sa Natalio Bacalso Avenue kon sirad-an ang kadalanan padung sa SRP. Tulo ka adlaw sa di pa ang Sinulog 2023, gi-pull out niya ang siyam ka mga contingent sa pro­binsya. Nikuyog ang contingent sa siyudad sa Lapu-Lapu.

Ang mga contingent nga wa modayon sa Sinulog 2023, ni-perform didto sa lungsod sa Carmen usa ka semana ang nilabay. Nisayaw sab si Gov. Garcia sa iyang ika-14 nga sayaw sa Sinulog. Didto sa Carmen, wa na maghuot ang trapiko kay gisirad-an man gyud ang highway.

Alang sa Sinulog 2024, dunay tanyag si Gov. Garcia nga mohatag ang Kapitolyo sa naandan nga financial support nga P20 milyunes ngadto sa Sinulog Foundation Inc. (SFI) kon ibalik ang Sinulog grand ritual showdown sa CCSC. Ang mga tagdumala sa SFI miingon nga ang Sinulog 2024 adto ipahigayon sa SRP apan di pa kini final.

○ ○ ○

Asa man gyud, CCSC o SRP? Ang CCSC gipasirad-an sa mayor niadto pang Mayo 18, 2023 alang sa renovation agi og pangandam sa pag-host sa Siyudad sa Sugbo sa 2024 Palarong Pambansa sa Hulyo 2024. Mahimo ba kining ablihan alang sa Sinulog?

Si SFI executive director Elmer “Jojo” Labella niingon niadtong Nobiyembre nga ang 2024 Sinulog adto gihapon sa SRP tungod sa renovation sa CCSC. Maalihan sab ang karaang rota sa Sinulog parade sa nagpada­yon nga construction sa Package 1 sa Cebu Bus Rapid Transit project gikan sa Osmeña Blvd. paingon sa N. Bacalso Ave.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph