Barrita: Substitution sa mga kandidato hugtan sa 2025 elections

Tipik sa balaod
Barrita Tipik sa Balaod
Barrita Tipik sa Balaod

Nasikop sa kapulisan ang usa ka batan-­ong babaye nga nagbaligya sa iyang unod. Atubangan sa imbestigador, mihimakak siya nga usa siya ka prostitute. Matod sa babaye, “Di ko prostitute, Sir oy. Ang akong Mama maoy prostitute. Pero gihilantan man si Mama. Nipuli ra ko niya. Substitute ra ko.”

Sa eleksyon, di sa prostitusyon, gitugotan ang substitution sa mga kandidato. Subay sa Section 77 sa Batas Pambansa Bilang 881, ang Omnibus Election Code, gitugotan ang substitution sa mga kandidato kon namatay, ni-withdraw o na-disqualify ang orihinal nga kandidato.

Kon namatay o na-disqualify ang original nga kandidato, ang substitute mahimong mo-file sa iyang certificate of candidacy (COC) hangtod sa udto sa adlaw sa eleksyon.

Apan sa mga kaso sa withdrawal sa orihinal nga kandidato, ang substitute maka-file sa iyang COC sigun sa tagal nga gisitar sa Commission on Elections (Comelec).

Nganong managlahi man? Sa kaso nga Federico vs. Comelec (G.R. No. 199612, 22 January 2013), ang Korte Suprema miingon nga lahi ang withdrawal sa kamata­yon ug sa disqualification kay ang withdrawal voluntary man.

Ug ang kandidato dunay igong panahon sa paghinuktok kon modayon ba o di sa iyang kandidatura samtang wa pa magsugod ang pag-imprinta sa mga balota.

Kon ang kandidato mi-withdraw sa dihang nahuman na ang pag-imprinta sa mga balota, ang pangalan sa substitute candidate di na masulod sa balota, busa ang boto alang kaniya mausik lang.

Sa ato pa, ang substitute candidate sa kandidato nga mi-withdraw human ma-imprinta ang mga balota ug mopasaka sa iyang COC la­pas sa gitakda nga tagal sa Comelec ug di ilhon nga balidong kandidato.

Ang mga opisyal sa Comelec miingon nga mas pahugtan pa nila ang mga lagda mahitungod sa withdrawal sa mga kandidato sa lokal ug nasyonal nga eleksyon sa Mayo 2025 ug sa substitute candidates.

Si Comelec Chairman George Garcia miingon nga ilang gitan-aw nga pagahimuon ang pagsang-at sa mga COC gikan sa Oktubre 1 hangtod sa 8, 2024.

Sa maong panahon, tugotan sa Comelec ang pag-withdraw sa kandidato ug ang katungod nga hulipan og laing kandidato sulod sa samang panahon.

Matod ni Garcia, di na tugotan ang substitution sa mga kaso sa withdrawal lapas sa Oktubre 8 aron di na mau­sab nga ang kandidato ni-withdraw sa duol na ang eleksyon.

Apan padayon ang Comelec nga modawat sa substitution of candidates sa namatay o na-disqualify nga kandidato.

Sa 2022 elections, ang filing period gitakda sa Comelec gikan sa Oktubre 1 hangtod sa 8 sa tuig 2021.

Apan gitugotan ang substitution due to withdrawal sa kandidato hangtod sa Nobiyembre 15, 2021.

Kon mahinumdoman, si Vice President Sara Duterte usa ka substitute candidate sa 2022 elections hulip kang Lyle Uy sa Lakas-CMD Party duha ka adlaw sa di pa ang Nobiyembre 15 nga deadline.

Si kanhi Presidente Rodrigo Duterte usa usab ka substitute candidate hulip lang Martin Dino sa PDP-Laban. (edbarrita@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph