Barrita: Way sinabligay og lapok

Nagsugod na ang kampanya sa mga kandidato sa lokal nga mga posisyon niadtong Biyernes, Marso 28. Sa unang panahon, mag-atang ang mga tawo sa kampanya kay mao kini ang panahon nga ilang mahibaw-an ang pagkatawo sa usa ka kandidato.

Ginaingon nga kon gusto kang mahibaw-an ang imong pagkatawo, dagan sa politika kay utingkayon sa imong kontrang kandidato ang tanan nimong baho, kahimtang ug kagikan. Iladlad ang tanan nimong hugaw sa publiko. Apan duna say makapahimuot. Sama niadtong usa ka kandidato nga mipasangil nga pisot ang iyang kaatbang. Tubag sa iyang kaatbang, “Pa­ngutan-a lang ang i­mong asawa kon pisot ba ko.”

○ ○ ○

Apan di kini mahitabo sa kampanya dinhi sa dakbayan sa Sugbo. Si Cebu City Ma­yor Raymond Alvin Garcia miawhag sa mga kandidato sa paglikay sa mga fake news ug mga personal nga atake.

Sa laktod, way sinabligay og lapok aron di magkabulingit. Matod pa ni Mayor Garcia, “You conduct yourself with utmost honesty, integrity. You treat your fellow candidates with respect, no below the belt, no mudslinging — mao nay pinaka-importante.” Kadtong pasangil nga pisot klaro tong below the belt. Maningkamot na lang ang mga kandidato nga madani nila ang mga botante. Pero dihay kandidato nga giingnan sa usa ka botante, “Mas mobotar pa ko ni Satanas kay nimo.” Tubag sa kandidato, “Unya, wa man modagan ang imong amigo, ako lay botari.”

○ ○ ○

Samtang sa laing bahin, mitumaw karon ang pangutana kon ang usa ka mayor nga gipalagpot na sa puwesto, mahimo pa bang palagputon og usab. Mao kini ang nahitabo ni kanhi Mayor Michael “Mike” Rama, laing kandidato sa pagkamayor sa siyudad sa Sugbo. Unang gi-dismiss si Rama sa Office of the Ombudsman niadtong Oktubre 24 sa kasong nepotism tungod sa iyang pagtudlo ug pagpatrabaho sa City Hall sa iyang duha ka ba­yaw nga mga lalaki.

Gi-dismiss na sab siya sa Ombudsman usa ka adlaw sa wa pa ang kampanya. Ning higayona, napalgan siyang sad-an sa grave misconduct ug conduct prejudicial to the best interest of the service tungod sa iregularidad sa pag-award sa mga kontrata sa paglabay sa mga basura. Duha ka kalbaryo ni Rama sa wa pa gani ang Semana Santa.