Sa Estados Unidos, nakaplagan sa usa ka pagtuon nga ang nag-unang hinungdan sa diborsiyo mao ang kaminyuon. Wa pay diborsiyo sa Pilipinas. Sama sa Vatican. Apan di kinahanglan ang diborsiyo sa Vatican kay ang nanagpuyo didto mga pari ug mga madre man.
Daghang mga unos nga mohasmag sa kinabuhi sa magtiayon. Sama sa bana nga nakaalinggat nga sa walo nila ka mga anak, dunay usa nga nalahi og nawong. Iyang gipangutana ang iyang asawa kon si kinsa ang amahan niini. Ang tubag sa asawa, “Ikaw.”
Dunay nangutana nganong manambok ang mga lalake kon maminyo. Usa sa mga tubag nag-ingon: Sa ulitawo pa, mouli, motan-aw sa refrigerator ug kon way mauyonan, mohigda sa kama. Kon maminyo na, mouli, motan-aw sa kama ug kon di makauyon sa nakita, moadto sa refrigerator.
○ ○ ○
Bitaw, usa sa mga mahinungdanong estasyon nga maagian sa kinabuhi mao ang kaminyuon. Sa mga babaye nga magminyo, kinahanglan nga bongga ug en grande gyud ang kasal, gikan sa trahe de boda hangtod sa reception.
Magkuha og wedding planner ang gustong magminyo. Apan dunay 67 ka mga kaslunon, kansang naghinangat nga kaminyuo hayan madiskaril kay ang ilang gikuha nga wedding coordinator, ang Joshua Events and Party Services, gikatahong nahanaw human makakolekta og minilyon ka pesos nga advance payment.
Nahanaw daw aso ang ilang mga damgo sa usa ka en grande nga kasal. Ang mga wedding planner di na makontak human nakolekta niini ang mokapin sa P13 milyones. Nakakuha kini gikan sa P40,000 ngadto sa P435,000 matag kaslunon.
○ ○ ○
Walay buhatan sa gobiyerno nga nagsuperbisar sa kalihukan sa mga wedding coordinator. Mao kini ang labing ulahing wedding scam dinhi sa Sugbo. Sa Hunyo 7, 2024, ang SunStar Cebu nitaho sa laing wedding coordinator scam nga naglambigit sa kantidad nga P3.6 million.
Sa Abril 23 ning tuiga, ang National Bureau of Investigation 7 nipasaka og kasong kriminal batok sa Tresa’s Creations and Events nga naglambigit sa mga transaksiyon nga mokabat og P40 milyones.
Ang mga wedding coordinator alang lang niadtong makabayad sa dakong kantidad nga gikinahanglan. Kadtong mga nagpuyo lang kay di gani makabayad sa simbahan, maghuwat na lang sa mga mass wedding nga gipasiugdahan sa mga lokal nga kagamhanan.