Barrita: Zero-billing program sa hospital sa gobyerno

Usa ka pasyente gitagalan na lang og unom ka buwan nga mabuhi. Matod sa pasyente, Dok, nagsabot baya ta nga data-data akong bayad nimo. Kon unom ka buwan ra ko mabuhi, di ko kaimpas sa akong bayranan nimo. "Ingon sa doktor, “Sigi lang, atong i-extend og usa ka tuig imong tagal."

Laing pasyente giingnan sa doktor nga maayo na siya ug makagawas na sa hospital. Busa, miadto siya sa billing section aron iyang mahibaw-an ang iyang bayranan sa hospital. Pagkakita niya sa bill nga dako kaayo, giatake sa kasingkasing ang pasyente.

Niadtong Septyembre 13, atol sa pagsaulog sa ika-67 nga adlawng natawhan ni Presidente Ferdinand "Bongbong" Mar­cos Jr., iyang gilusad ang “zero-billing†program. Ubos niini, libre tanan ang serbisyo medikal sa 22 ka mga hospital sa gobyerno sa tibuok nasud.

○ ○ ○

Apan ang sagad nga nasinati sa pasyente ug tagtungod sa mga pasyente mao ang kakuwang sa supply sa mga hospital sa gobyerno. Usahay, ang mga pasyente mao pay papaliton og gapas ug ubang mga kagamitan.

Hinuon, ang Zero-billing program sa pangulo adunay pundo nga P328 milyones gikan sa Department of Health (DOH). Lakip niini ang inpatient, outpatient ug emergency services. Lakip sab niini ang mga medisina ug tambal, chemothe­rapy, dialysis, dental services ug labo­ratory procedures. Kining libre tanan nga serbisyo medical ipatuman sa walo ka mga dagkong hospital sa National Capital Region, lakip sa National Kidney and Transplant Institute ug sa Philippine General Hospital, ingon man sa 14 ka mga hospital sa Luzon, Visayas ug Mindanao.

○ ○ ○

Ingon sa gamay ra ang pundo nga gigahin alang niini kon atong kwentahon ang nisulbong nga presyo sa mga tambal ug medisina. Apan suportado kining maong programa ni House Speaker Ferdinand Martin Romualdez. Sayod kita nga ang Kongreso maoy nagkupot sa puntil sa gobyerno.

Matod sa House Speaker, ang programa sa presidente nagpakita sa iyang way paglubad nga pasalig nga way Pilipino nga mibiyaan sa serbisyo medikal ug sa tinud-anay nga pag-atiman sa kahimtang sa panglawas sa katawhan. Ang atong pangutana, nasul­bad na ba kaha ng kakuwang sa mga nurses sa atong mga tambalanan, pribado o gobyerno man? Daghan kitag nadawat nga mga taho nga daghang mga hospital ang mobalibad sa pagdawat og mga pasyente tungod lagi sa kakuwang sa mga nurses.